Aqtóbede turǵyndardyń kásip ashýy úshin 3 mlrd teńge bólinedi
Bıyl 9 aıdyń qorytyndysy boıynsha Aqtóbe oblysynda turaqty makroekonomıkalyq ósim saqtalyp otyr. Bul týraly oblys ákimi Eraly Toǵjanov oblystyq, qalalyq máslıhat depýttary, Qoǵamdyq keńes múshelerimen kezdesýinde aıtty.
Esepti kezeńde jeti negizgi áleýmettik-ekonomıkalyq kórsetkishtiń altaýynda ósim bar. Atap aıtqanda, ónerkásiptiń ósý qarqyny 101,8%, ınvestıtsııalar – 101,3%, aýyl sharýashylyǵy – 105,8%, qurylys – 103,6%, turǵyn úıdi paıdalanýǵa berý – 101,8%, kólik jáne qoıma logıstıkasy – 103,1% deńgeıin kórsetti. Byltyrǵymen salystyrǵanda tómen kórsetkish tek saýda salasynda baıqalady.
Oblys ákimi baspasóz qyzmetiniń habarlaýynsha, Eraly Toǵjanov oblys ákimi qyzmetine taǵaıyndalǵan kúnnen bastap óńirdiń barlyq aýdanyn aralady. Halyqty tolǵandyrǵan problemalyq máselelerdi jeke baqylaýyna aldy. Nátıjesinde qysqa merzimde 41-razezd aýdanynda «Ońtústik aınalma jol» jáne «Aqtóbe-Qandyaǵash» qaıta jańǵyrtylyp jatqan joldardyń tórt jolaǵynyń ekeýi paıdalanýǵa berildi. Jol qurylysy maýsymynyń qyzǵan kezinde bıtým tapshylyǵy máselesi sheshildi.
Aqtóbe qalasynyń aýmaǵyn abattandyrý jáne sanıtarııalyq tazartý jumystary kúsheıtildi. Qazan aıynda Astanada ótken «KGIR 2022» halyqaralyq forýmynda oblysty damytý baǵytynda mańyzdy kelisimderge qol qoıyldy. Onyń sheńberinde quny 735 mıllıon dollar bolatyn iri ınvestıtsııalyq jobalar iske asyrylady. Kelesi jyldan bastap Aqtóbe qalasynda bıtým zaýyty, ıadrolyq medıtsınalyq ortalyǵy, kárizdik tazartý qurylǵysy jobasy, kólik-logıstıkalyq haby jáne elimizdegi eń iri bolat balqytý zaýyty salynady.
«Bizdiń aldymyzda óńirdiń ózekti máselelerin ári qaraı tıimdi sheshý mindeti tur. Onyń ishinde, aýyl halqynyń tabysyn arttyrý úshin biz «Aýyl amanaty» pılottyq jobasyn iske qosamyz. Bıyl jobaǵa respýblıkalyq bıýdjetten 3 mlrd teńge bólinip, 61 eldi mekenniń turǵyndary 2,5% jeńildikti nesıe alyp, óz bıznesin bastaı alady. 2023 jyly qosymsha 3,5 mlrd teńge bólinip qamtylatyn aýyldar sany artady. Osy jobany iske asyra otyryp, biz jańa jumys oryndaryn ashamyz, mal men qus basyn kóbeıtemiz jáne óńirdiń azyq-túlik qaýipsizdigin qamtamasyz etemiz», - dedi óz sózinde oblys ákimi Eraly Toǵjanov.
Budan ózge Memleket basshysynyń tapsyrmasyna sáıkes, shaǵyn jáne orta kásipkerlikti damytý arqyly Hromtaýdyń ekonomıkasyn ártaraptandyrýǵa erekshe kóńil bólinbek. Dálirek aıtqanda shaǵyn jáne orta bızneske jalpy somasy 2 mlrd teńge bolatyn 3 paıyzdyq nesıe beriledi.
Oblys ákiminiń jiti baqylaýyndaǵy taǵy bir problema – joldardyń sapasy. Іri jobalardyń qatarynda «Aqtóbe-Qarabutaq-Ulǵaısyn», «Qandyaǵash-Embi-Shalqar-Yrǵyz» jáne «Aqtóbe-Bolgarka-Shubarqudyq» trassalaryn jóndeý bar.