Aqtóbede turǵyn úıge jaýapty sheneýnikke qatysty sot otyrysy ótýde

AQTÓBE. QazAqparat – Aqtóbe qalalyq turǵyn úı qatynastary bóliminiń basshysy Janargúl Dúısekenova men buryn halyqqa qyzmet kórsetý qyzmetinde jumys istegen Gúlaıym Nurmuhanovanyń isi sotqa jetti. Olarǵa 50-ge jýyq adamnan 100 mıllıon teńge shamasynda aqshany alaıaqtyq jolmen aldy dep aıyp taǵylyp otyr, dep habarlaıdy QazAqparat tilshisi.

Búgin sot aldy tyńdaýy ótip, memlekettik aıyptaýshy Dııas Ilıasov aıyptaý qorytyndysyn oqydy.

Іs materıalyna súıensek, Gúlaıym Nurmuhanova men Janargúl Dúısekenova qyzmet barysynda tanysyp, 2014-2015 jyldary aralyǵynda J.Dúısekenova G.Nurmuhanovany bas maman bolyp jumysqa ornalasýǵa shaqyrady. Bul qyzmetke turýǵa 2 mıllıon teńge suraǵan. Ári Batys-2 aýdanynan memlekettik baǵdarlama arqyly 2 bólmeli páter alýǵa bolatynyn aıtqan.

«2014-2015 jyly J.Dúısekenova óz usynysyn taǵy da aıtyp, ekeýi kelisedi. Keıin qylmystyq jospar quryp, memlekettik baǵdarlamamen jaldamaly páterdi kezeksiz alatyn adamdardy izdeıdi. Ekeýi uıaly telefonmen habarlaspaǵan, jumystyń baılanys telefonyn qoldanǵan. 2014 jyldyń kúzinde G.Nurmuhanova alǵashqy adamdy taýyp, Aqtóbe qalasynyń turǵynynan 2,1 mıllıon teńge alǵan, páterin kórsetken», - dedi prokýror Dııas Ilıasov.

Jábirlenýshiler páter alyp beretin adam jaıly bir-birinen estip, aldanǵan. Olardyń qatarynda baspana kezeginde turǵandar men kezekke ilikpegender de bar. Medıtsına qyzmetkeri, jumyssyzdar ben saýdager, kásipkerler de mıllıondap aqsha bergen.

«Men 2003 jyly Aqtóbege kóship keldim, oralmanmyn. Sol jyldary páter kezegine turǵanymmen qalaı ekeni belgisiz qujattarym joq bolyp ketti. Sodan memlekettik baǵdarlamamen páter alyp beretinder týraly estidim. Jańylsyn Tileýova men mektep muǵalimi Balzııa Omarova kelisimshart ákelip, mórin basyp berdi. Úsh bólmeli, aýmaǵy 120 sharshy metr bolatyn páterdi kórsetti. Senip 3,8 mıllıon teńge berdim. Aıyptalýshylar arasynda G.Nurmuhanovany ǵana tanımyn. Sol úshin men 2 mıllıon teńge nesıe aldym, balamdy úılendiremin dep otyrǵan aqshamdy saldym», - dedi jábirlenýshi Gúlzar Sultanova.

Sottalýshy Janargúl Dúısekenova ózine taǵylǵan aıyppen kelispeıdi. Ol memlekettik baǵdarlamamen páterlerdi zańsyz berý deregi tirkelmegenin, jábirlenýshilerdiń eshqaısysyn tanymaıtynyn alǵa tartty.

«Men eshkimniń ala jibin attaǵan joqpyn. Jábirlenýshilerdiń eshqaısysyn tanymaımyn, olardan aqsha almadym, kóz jasyna qalmadym. Sot materıaly boıynsha 50-ge jýyq jábirlenýshi bar. Olardyń shyǵyny 100 mıllıon teńge jýyq dep jazylǵan. Tergeýdiń júrip jatqanyna 11 aı boldy. Osy ýaqytqa deıin maǵan naqty qandaı aıyp taǵylǵanyn túsinbeı otyrmyn», - dedi sottalýshy J.Dúısekenov.

Sot otyrysy jalǵasyp jatyr.

Eske salsaq, baspana almaq bolǵan bir top aqtóbeliktiń aldanyp, mıllıondarynan aıyrylǵanyn, qalalyq turǵyn úı qatynastary bóliminiń basshysy Janargúl Dúısekenovanyń qamaýǵa alynǵanyn buǵan deıin jazǵan bolatynbyz.