Aqtóbede turǵyn úıdiń qabyrǵasyna Álııa men Mánshúktiń portreti salyndy
AQTÓBE. QazAqparat - Aqtóbede turǵyn úıdiń qabyrǵasyna qazaqtyń qos batyr qyzy Álııa Moldaǵulova men Mánshúk Mámetovanyń portreti salyndy. Bul jumystar ári qaraı jalǵasyn tabady, dep habarlaıdy QazAqparat tilshisi.
Elbasy Nursultan Nazarbaevtyń «Aqtóbeniń úıi birkelki» degen synynan soń kópqabatty turǵyn úılerdiń qasbetin boıaý, sýret salý jumystary jan-jaqty júrip jatyr. Turǵyn úılerdiń qabyrǵasyn boıaý kezinde jergilikti bıliktiń jumysy synǵa da ushyraýda . Degenmen bul baǵyttaǵy jumys toqtaǵan joq. Jergilikti dızaınerler Batys-2 aýdanyndaǵy «Densaýlyq» saıabaǵy mańynda sport taqyrybyn qamtıtyn sýretterdi salyp, keıin qazaqtyń qos batyr qyzy Álııa Moldaǵulova men Mánshúk Mámetovanyń portretin qolǵa aldy.
«Aqtóbe qalasynyń qurylys keńesi Álııa Moldaǵulova men Mánshúk Mámetovanyń sýretin salý týraly usynysty qoldady. Jergilikti dızaınerler salǵan sýret 3 jylǵa shydamdy. Aldaǵy ýaqytta «Máńgilik el», óner taqyryby qamtylady. Keńes sheshimimen soń demeýshilerdiń kómegine júginemiz»,- dedi Aqtóbe qalalyq sáýlet jáne qala qurylysy bóliminiń basshysy Tanat Shegebaev. Jergilikti bılik úılerdiń qasbetin boıaý jumystaryna bıýdjetten qarjy bólmeıdi. Bárine kásipkerler qoldaý kórsetip otyr. Bıyl qurylys kompanııalarynan da úıdiń qasbetine salý usynystary túsken. Degenmen Aqtóbe qalasynyń ákimdigi qurylys kompanııasy salǵan Mustafa Shoqaıdyń sýretin jaramsyz dep tanyp, ony qaıta boıaýǵa mindettedi . Qazirgi kezde qalada birneshe úı boıalyp jatyr. Turǵyndar syn aıtyp, tústerdiń durys tańdalmaǵanyn eskertse, ony qaıta boıaýǵa múmkindik bar.
