Aqtóbede turǵyn úı sertıfıkattary kimge jáne qandaı sharttarmen beriledi
Búgin oblystyq máslıhat sessııasynda oblys boıynsha turǵyn úı sertıfıkattarynyń mólsherin jáne alýshylar sanattarynyń tizbesin aıqyndaý máselesi talqylandy. Oblystyq energetıka jáne turǵyn úı kommýnaldyq sharýashylyǵy basqarmasynyń basshysy Dastan Amanovtyń aıtýynsha, qazir 1 myń páter ıesin kútip tur.
«Sertıfıkat berýdiń eki túri bar. Biri áleýmettik kómek, ekinshisi áleýmettik qoldaý. Áleýmettik kómek kezinde aqsha keri qaıtarylmaıdy. Al áleýmettik qoldaý kezinde bıýdjettik nesıe beriledi. Áleýmettik kómek sertıfıkatyn berý kezinde alǵashqy jarnanyń 90 paıyzyn berý, áleýmettik qoldaý sertıfıkatyn berýde alǵashqy jarnanyń 50 paıyzyn quıý usynylyp otyr. Sońǵysy «Nurly jer» jáne «7-20-25» baǵdarlamasymen baspanaly bolýǵa múmkindik beredi. Ár sertıfıkat 1 mıllıon teńgeden aspaıdy. «Baqytty otbasy» baǵdarlamasy boıynsha páter quny 10 mıllıon teńge bolsa, alǵashqy jarna - 1 mıllıon teńge. Memleket 900 myń teńge beredi, satyp alýǵa 100 myń teńge qosýy tıis. Al «Nurly jer» jáne «7-20-25» baǵdarlamasymen baspana alý kezinde 10 mıllıon teńgeniń úıin satyp alý úshin 2 mıllıon teńge kerek. Biz 1 mıllıon teńgege deıin ǵana qarjy bóle alamyz. Sondyqtan 50 paıyzyn memleket esebinen berý josparlanyp otyr», - dedi Dastan Amanov.
Turǵyn úı sertıfıkaty kópbalaly, tolyq emes jáne múgedek bala asyrap otyrǵan otbasylarǵa beriledi. Sonymen qatar densaýlyq saqtaý, bilim berý, mádenıet, sport salalaryndaǵy bıýdjettik uıymdardyń qyzmetkerleri de úmitker bola alady. Sessııaǵa oblys basshysy Ońdasyn Orazalın qatysyp, baspanamen qamtýdyń máselesi basty nazarda turǵynyn aıtty.
«Oblystaǵy az qamtylǵan jáne kópbalaly analardyń baspanaly bolýyna qoldaý kórsetilip keledi. Aldaǵy ýaqytta osy jumystardy ózderińizben birlesip jalǵastyramyz degen senimdemin», - dedi óńir basshysy.
Aıta keteıik, bıyl turǵyn úı sertıfıkatyn berýge jergilikti bıýdjetten 200 mıllıon teńge qarastyrylǵan. Keler jyly bólinetin qarjy kólemi artýy múmkin.
