Aqtóbede turǵyn úı qatynastaryna jaýapty sheneýnik qamaýǵa alyndy
Aqtóbe qalalyq mamandandyrylǵan tergeý sotynda búgin qamaýǵa alý jóninde sanktsııa berdi. Qalalyq turǵyn úı qatynastary bóliminiń basshysy Janargúl Dúısekenova Qylmystyq kodekstiń «Alaıaqtyq» baby boıynsha kúdikke ilikti.
Tergeý materıaldaryna súıensek, Janargúl Dúısekenova 2015-2018 jyldary aralyǵynda 30-tan astam adamnyń senimine kirip, memlekettik baǵdarlama aıasynda páter alyp beremin dep aldaǵan. Qazirgi ýaqytta sotaldy tergeýine úsh jábirlenýshi qatysty. Olar qalalyq ákimdikte páter alý kezeginde turǵan jáne kezegin jyljytýǵa aqsha bergen. Kóbi sheneýnik suraǵan aqshany taýyp berý úshin nesıe alǵan eken.
«Sotaldy tergeýiniń habarlaýymen Dúısekenovanyń memlekettik qyzmetker bola tura G.Nurmuhanovamen kelisip, bótenniń múlkin jymqyrý, syıaqyǵa memlekettik baǵdarlamamen úı alyp berýge ýaǵdalasyp, kúdikke ilikti. 2015 jyldyń 8 mamyry kúni Muhtarovadan 1 mıllıon 80 myń teńge, 2017 jyldyń maýsymynda Qoshanovadan 2 mıllıon 100 myń teńge, 2017 jyldyń qarasha aıynda Isanovadan 1 mıllıon 200 myń teńge alǵan. Aqshany ózara bólisken. Dál osyndaı taǵy 35 epızod bar. Shyǵyn 100 mıllıon teńgeni qurap otyr. Prokýror sot otyrysynda J.Dúısekenovanyń jemqorlyq faktisi boıynsha kúdikke ilikkenin aıtyp, ony qamaýda qaldyrýdy surady», - dedi sýdıa Maqsat Dúısen.
Tergeý soty tergeýshiniń ótinishhatyn qabyldap, kúdikti Janargúl Dúısekenovany eki aı qamaýǵa alý jóninde sheshim shyǵardy. Ol endi tergeý aıaqtalǵansha ızolıatorda otyrady. 