Aqtóbede turǵyndar jylý tarıfin páterdiń ár sharshy metrine tóleýge qarsy shyqty
AQTÓBE. KAZINFORM – Aqtóbe qalasy Eset batyr turǵyn alabynyń halqy kommýnaldyq mekeme qyzmetkerleriniń jylýdy esepteý qurylǵysyndaǵy kórsetkishti qabyldamaı jatqanyn aıtyp, shaǵym túsirdi. Qazirgi kezde jylý taratýshy, qala ákimdigi men PIK ózara kelise almaı jatyr.
Aqtóbe qalasy Eset batyr turǵyn alabynyń halqy kópqabatty turǵyn úıdegi ortaq esepteýish qurylǵysyn teksertip, qaıta qondyrý talabymen kelispeıdi. Jylytý maýsymynda osy qıyndyqpen betpe-bet kelgen turǵyndar buǵan qarsy ýáj aıtty.
– Eset batyr turǵyn alabynda 2018 jyldan beri turamyn. Sodan beri jylýdy óz qabatymyzda ornalasqan esepteýish qurylǵysyndaǵy kórsetkish arqyly tólep kelemin. Ony byltyr 25 myń teńgege teksertip, qaıta qondyryp aldyq. Bes jyldyq kepildigi bar. Eki bólmeli páterge qysta 6 myń teńge esepteledi. Al qazir sol eki bólmeli páterimizde 16 myń teńge shyǵaryp berip tur. Turǵyndar buǵan kelispeıdi. Bizdi jylýdan ajyratsa da ol aqshany tólemeımiz. Al turǵyn úıdegi ortaq esepteýish qurylǵysyna keler bolsaq, ony jylytý maýsymynda ǵana estip otyrmyz, - dedi Arman Almatov.
Turǵyndar aryz jazyp, Aqtóbe qalalyq turǵyn úı ınspektsııasyna jetkizdi. Ázirge jaýabyn almady.
Al «Adal qyzmet» PIK tóraǵasy Dáýlet Nurlanovtyń aıtýynsha, ózine qarasty 78 kóppáterli turǵyn úıde osy problema bar. Bárine qazan aıynda qosylǵan jylýǵa ár sharshy metr úshin aqy tóleıtini týraly aıtylǵan. Sodan keıin bul másele Aqtóbe qalasy ákimdiginde qaıta kóterildi.
– Ákimge baryp, máseleni aıtamyz. Jaz boıy jınalys ótkizip jatqan kezde ózderi toqtatyp qoıdy. Sebebi bizde sol eseptegish qurylǵysyna kezinde qabyldaý aktisi berilmedi. Qabyldanbaǵan qurylǵyny biz qalaı teksertemiz. Keıbirindegi qurylǵy talapqa saı emes, keıbirinde múlde joq. Naqtylasam, merdigerden qabyldaǵanda tapsyrys berýshi, ıaǵnı, ákimdik durys qaramaǵan. «Aqtobe su-energy group» AQ-y da sony bile tura jeke adamdarmen kelisimshartqa qol qoıdy. Osy kúnge deıin jylý joǵaltý tirkelmedi. 10 jyldan keıin jańa ádisteme shyǵaryp tur. Bul halyqtyń qaltasyna aýyr tıedi, - dedi «Adal qyzmet» PIK tóraǵasy Dáýlet Nurlanov.
Onyń aıtýynsha, keıbir kópqabatty úıdiń ár podezinde bir eseptegish qurylǵysy bar. Árqaısysyn teksertip, qaıta qondyrý quny 190 myń teńge turady.
Aqtóbe qalalyq ákimdigi mán-jaıdan habardar. Búgin ǵana PIK tóraǵalaryn jınap, túsindirý jumysyn ótkizdi. Oǵan «Aqtobe su-energy group» AQ, QR UEM Tabıǵı monopolııalardy retteý komıteti oblystyq departamentiniń ókilderi de qatysty.
– «Aqtobe su-energy group» AQ-y bergen aqparatqa súıensek, 2024-2025 jylǵy jylytý maýsymynda jylýmen jabdyqtaý qyzmetteri úshin esepteý algotrıtmi ózgertildi. Jalpy úılik aspap bolǵan kezde ǵana jylý energııasyn esepke alý quraldarynyń kórsetkishteri qabyldanady. Osyǵan baılanysty halyqty aqparattandyrý úshin 2024 jyldyń mamyr aıynan bastap túbirtek arqyly habarlama berildi. Onda ortaq esepke alý aspaptarynyń jumysyn qalpyna keltirý nemese memlekettik tekserý júrgizý qajet ekeni jazyldy. Jylýdy esepke alatyn ortaq qural bolmaǵan jaǵdaıda QR Ulttyq ekonomıka mınıstrligi Tabıǵı monopolııalardy retteý komıtetiniń Aqtóbe oblysy boıynsha departamenti bekitken tarıfke sáıkes esepteý júrgiziledi. Bul turǵyndardyń óz úıleri. Buǵan bıýdjetten qarajat bólý zań boıynsha múmkin emes, - dep habarlady Aqtóbe qalasy ákiminiń baspasóz qyzmeti.
«Adal qyzmet» PIK tóraǵasy Dáýlet Nurlanovtyń aıtýynsha, bul másele erteń taǵy kóteriledi. Ol kezde kezdesýge turǵyndar shaqyrylady.
