Aqtóbede turǵyndar úshin 21 500 tonna kómir qajet

AQTÓBE. KAZINFORM – Aqtóbe oblysy boıynsha turǵyndarǵa 21 500 tonna kómir qajet bolsa, onyń 3 250 tonnasy temirjol tuıyǵynda bar. Al mektep pen densaýlyq saqtaý mekemelerine qajetti 26 myń tonnadan astam qatty otyn tolyq jetkizildi. 

2024-2025 jyldardaǵy jylytý maýsymy kezinde Aqtóbe oblysynyń bıýdjettik mekemelerine 26 739 tonna kómir qajet boldy. Onyń 23 123 tonnasy 103 mektepke, al 626 tonnasy 62 densaýlyq saqtaý mekemesine bólinedi. Qazirgi kezde bilim jáne emdeý ornyna qajetti qatty otyn tolyq jetkizildi. 

– Oblys halqyn jáne bıýdjettik mekemelerdi qatty otynmen qamtamasyz etýmen aınalysatyn 16 óńirlik kómir operatory bar. Kómir Maıkóben, Qarajyra, Shubarkól ken oryndarynan tasymaldanyp jatyr. Qajetti qatty otyn tamyz aıynan bastap tasymaldandy. Temir jol tuıyqtarynda 3 250 tonna kómir bar. Bıýjettik mekemeden bólek turǵyndarǵa 21 500 tonna kómir qajet. Kómir baǵasy tonnasyna – 23 000 teńge. Jalpy basqarma tarapynan «QTJ – Júk tasymaly» JShS Batys fılıalymen birlesip vagondardyń kelýine kúndelikti monıtorıng júrgiziledi, - dep jaýap berdi Aqtóbe oblystyq energetıka jáne turǵyn úı-kommýnaldyq sharýashylyq basqarmasy Kazinform tilshisiniń saýalyna. 

Aıta keteıik, Aqtóbe oblysynda 320 eldi meken bar. Onyń 168-i (52,5%) nemese 886,5 myń adam (95,5%) kógildir otynmen qamtamasyz etilgen. Bıyl 27 eldi mekendi gazdandyrý úshin 20 joba qolǵa alyndy. Jyl sońyna 3 aýylǵa gaz beriledi. Budan basqa 4 aýyldy gazdandyrý maqsatynda jobalyq-smetalyq qujat ázirlendi. Taǵy 6 aýylǵa qajetti jobalyq-smetalyq qujat jasalyp jatyr. Nátıjesinde eldi mekenderdi gazben qamtý kórsetkishi 64,1%, al turǵyndardyń qamtý 97,2%-dy quraıdy.