Aqtóbede turǵyn úıdi basqarý júıesin jańǵyrtýǵa naqty qadamdar jasaldy
ASTANA. KAZINFORM – Aqtóbe qalasynda «AMANAT» partııasynyń «TURGYNDAR AMANATY» jobasy aıasynda aýqymdy óńirlik forým ótip, turǵyn úı-kommýnaldyq sharýashylyǵy salasyndaǵy júıeli ózgerister, naqty máseleler men olardy sheshýdiń praktıkalyq tetikteri ashyq talqylandy.
Forým alańynda memlekettik organdar, depýtattar, MIB pen PIK tóraǵalary alǵash ret keńeıtilgen formatta tikeleı dıalog qurdy.
Іs-shara ashyq formattaǵy paneldik otyrystan bastalyp, plenarlyq sessııaǵa ulasty. Onda turǵyn úı qoryn jańǵyrtý, ınjenerlik ınfraqurylymnyń tozýy, tarıftik saıasat, basqarý nysandarynyń tıimdiligi, kondomınıým obektilerin tirkeý, kommýnaldyq qyzmet sapasy jáne turǵyndardyń tólem tártibi sııaqty túıini tarqamaǵan túıitkilderdi ashyq talqyǵa tústi. Óz kezeginde jergilikti atqarýshy organdar bul máseleler boıynsha naqty túsiniktemeler berip, birqatar máseleni sheshý joldaryn belgiledi.
Plenarlyq otyrysta sóz alǵan óńir basshysy Ashat Shaharov «TURGYNDAR AMANATY» jobasynyń turǵyn úı-kommýnaldyq sharýashylyǵy salasyn damytýǵa jáne azamattar úshin qolaıly ári qaýipsiz orta qalyptastyrýǵa serpin beretinin atap ótti.
«Búgingi jıyn – ortaq maqsatqa jetý jolyndaǵy naqty qadamdarymyzdyń biri. Otyrysta kóterilgen barlyq másele nazarǵa alynyp, olardy sheshý boıynsha tıisti jumystar júıeli túrde jalǵasyn tabady. Árbir usynys salalyq jospar men is-sharalar barysynda eskerilip, onyń oryndalýy tıisti memlekettik organdar baqylaýynda bolady. Ortaq mindetterdi oryndaýda júıeli ári nátıjeli jumys júrgizý qajet», – dedi ol.
Al «AMANAT» partııasynyń Hatshysy Erjan Jylqybaev óz sózinde partııa bastamasymen iske qosylǵan bul joba kóppáterli turǵyn úılerdegi júıeli máselelerdi sheshýdiń naqty quralyna aınalyp otyrǵanyn atap ótti.
«Bul baǵyttaǵy ózgerister – tarıfter, abattandyrý, jaryqtandyrý, lıftiler men qaýipsizdik – árbir turǵynnyń kúndelikti ómir sapasyna tikeleı áser etedi. Sondyqtan biz tek talqylaýmen shektelmeı, naqty sheshimderge kóshýimiz qajet. Partııa naqty nátıjege baǵyttalǵan júıeli jumysty jalǵastyrady», – dedi ol.
Óz kezeginde depýtat Ekaterına Smyshlıaeva qaraýsyz qalǵan úıler máselesine toqtalyp, ákimdikterge olardy memlekettik uıymdar arqyly ýaqytsha basqarý ókilettigi berilgenin atap ótti. Bul – áleýmettik turǵydan mańyzdy sheshim.
«Jańa zańda turǵyn úı ınspektsııasymen jáne kommýnaldyq qyzmettermen ózara is-qımyl reglamentteri aıqyn belgilendi. Biraq tájirıbede máseleler bar ekenin kórip otyrmyz. Osy turǵyda bizdiń joba negizgi kommýnıkatsııalyq alań bolady. Árbir tóraǵa, úıdiń ókili basqarýǵa qatysty máseleler boıynsha «AMANAT» partııasyna júgine alady jáne qajet bolǵan jaǵdaıda tıisti qyzmettermen tikeleı baılanys uıymdastyrylady.
Kadr máselesi de partııanyń basty nazarynda. Salaǵa keletin mamandardyń biliktiligin arttyrý, sertıfıkattaý júıesin jetildirý jáne oqytý sapasyn arttyrý – aldaǵy kezeńniń negizgi mindetteriniń biri. Biz oqý jáne test materıaldarynyń sapasyn, sondaı-aq tóraǵalar úshin sertıfıkattaý qyzmetteriniń qoljetimdiligin baqylaý baǵytynda jumys júrgizemiz», – dedi depýtat Ekaterına Smyshlıaeva.
Májilis depýtaty Qazybek Álishev turǵyn úı-kommýnaldyq sharýashylyq salasyndaǵy reformalardyń mánin egjeı-tegjeıli túsindirdi. Onyń aıtýynsha, «Turǵyn úı qatynastary týraly» Zańdaǵy ózgerister bul salany túbegeıli jańǵyrtýǵa baǵyttalǵan.
Іs-shara barysynda óńirdegi turǵyn úı qorynyń naqty jaǵdaıy jáne keıingi jyldary júrgizilgen jumystar da ashyq aıtyldy. Oblysta 12 mlrd teńge kóleminde qarjy bólinip, 255 turǵyn úıge jóndeý jumysy júrgizilgen, sondaı-aq 223 lıft jańartylǵan. Budan bólek basqarý júıesin jańǵyrtý baǵytynda 331 MIB quryldy.
