Aqtóbede turǵyn úı qatynastary bóliminiń burynǵy basshysy sot aldynda jaýap berip jatyr
AQTÓBE. KAZINFORM — Jandos Álimovke Qylmystyq kodekstiń «Bılikti nemese laýazymdyq ókilettilikti asyra paıdalaný» baby boıynsha aıyp taǵyldy. Qazirgi kezde is materıaldary zerdelenip jatyr.
Aqtóbe qalalyq turǵyn úı qatynastary bóliminiń burynǵy basshysy Jandos Álimovke qatysty is sotqa osy aıda tústi. Oǵan Qylmystyq kodekstiń 362-baby 4-bóligi 3-tarmaǵy boıynsha aıyp taǵyldy. Іs materıalyna súıensek, sottalýshy 2021-2022 jyldary aralyǵynda 15 adamǵa negizsiz páter bólip, memleketke shyǵyn keltirgen.
Búgin is materıaldaryn zerdeleý jalǵasty. Qujattardyń túpnusqasy arasynda Memlekettik turǵyn úı qorynan baspana berý jáne jaldaý sharttaryn qaıta rásimdeý týraly komıssııa otyrysyndaǵy hattama, páter alǵan adamdardyń aty-jóni men berilgen baspananyń mekenjaıy týraly aqparat aıtyldy. Ýaqytsha páter alǵandardyń arasynda buryn sońdy úı kezegine turmaǵandar da bolyp shyqty.
— Kezekte turmasa da jaldamaly páterdi ýaqytsha bergen. Demek olar qandaı da bir sanatqa kirmeıdi. Soǵan qaramastan páterdi berip tur, — dedi prokýror Sáken Bertileýov.
Al jábirlenýshi tarap bolsa, ýaqytsha baspana tek kezekte turǵan adamdarǵa beriletinin aıtty.
Sottalýshy ózine taǵylǵan aıyppen kelispeı, bári de komıssııa otyrysynda qaralyp, sheshim ortaq kelisimmen shyǵarylǵanyn aıtty.
Aıta keteıik, Jandos Álimov byltyr qańtarda Aqtóbe oblysy eńbek ınspektsııasy jónindegi basqarmaǵa basshy qyzmetine taǵaıyndaldy.
Ol 2020-2024 jyldar aralyǵynda Aqtóbe qalalyq turǵyn úı qatynastary bólimin basqardy.