Aqtóbede turatyn ózge ult ókilderi Qazaqstan halqyna rızashylyǵyn jetkizdi
AQTÓBE. QazAqparat - Aqtóbede 18 etno-mádenı birlestik bar. 90-nan astam ózge ult turady. Qazaqstan halyqtarynyń birligi kúni ózge ult ókilderi Qazaqstandaǵy beıbitshilik pen tatýlyq, dostyq úshin alǵystaryn jetkizdi, dep habarlaıdy QazAqparat tilshisi.
Qazaqstanda týyp-ósken «Zlatoblıýmen» nemis etnomádenı birlestigi jetekshisiniń orynbasary Palına Pýhovıkova bul elden alysqa uzap ketpeıtinin aıtyp, qazaq halqyna rızashylyǵyn jetkizdi. Myńdaǵan aqtóbeliktiń aldynda bar syryn aıtqan P.Pýhovıkova basyn ıip, alǵys aıtty. «Men úshin bul merekeniń orny erekshe. Meniń ultym - nemis. Germanııaǵa ketip, sol jaqta tura alatyndaı múmkindigim boldy. Tipti ol jaqqa bardym. Biraq ol elde men qonaqpyn. Germanııaǵa kóship ketip, birneshe jyl tursam da men qonaq bolyp qalar edim. Al bul jer meniń óz úıim. Bári týys, jaqyn. Men Mártók aýdanynyń Kazanka aýylynda turamyn. Úıimniń aýlasynda alma baǵy bar. Jabyrqap, muńaıǵanda sol baqqa shyǵamyn. Ol jere tynyshtyq ornaǵan. Bári meni jubatatyndaı. Mundaı jylylyq tek adamnyń óz úıinde bolady eken. Dál osyndaı meıirimdilik tek týǵan anań men týǵan jerde bar. Biz osy tynyshtyǵymyzdy, dostyǵymyzdy, tatýlyǵymyzdy baǵalaýymyz kerek. Osy elde týyp-óskenim úshin alǵysym sheksiz. Shydamdy, dostyqqa berik, qonaqjaı Qazaqstanǵa basymdy ıemin», - dedi P.Pýhovıkova.
Al 2014 jyly Ýkraınada bolǵan dúrbeleń kezinde Qazaqstannan pana tapqan Ivan Dýltsevtiń otbasy qazir kásippen aınalysyp, el damýyna úles qosyp júr.
«Men ýkraın etnomádenı birlestiginiń ókilimin. 2014 jylǵa deıin Ýkraınanyń Lýgansk qalasynda turyp, halyqtyń ómirin túbegeıli ózgertken jaısyz oqıǵanyń kýási boldym. Sodan beri soǵys degenniń ne ekenin bilemin. Soǵys úıińnen, otbasyńnan, bolashaǵyńnan aıyrady. Sol kezde Qazaqstan dál burynǵydaı bizdi qabyldady. Bul jer men úshin eń baı ólke. Bul jerde beıbitshilik pen turaqtylyq ornaǵan. Qazaqstanda kásipker atanyp, jeke tulǵa bolyp qalyptasýyńa bar jaǵdaı jasalǵan eken. Qazaq jerinde jumysqa ornalasyp, jańa dostar taptym. Men ózimniń, balalarymnyń bolashaǵyn osy elmen baılanystyramyn. Beıbitshilik zaman úshin Qazaqstan halqyna alǵys aıtamyz», - dedi «Spetstehnıka» JShS dırektory Ivan Dýltsev.
