Aqtóbede turaqtandyrý qorynan satylymǵa shyǵarylǵan kartop sapasy synǵa ushyrady

AQTÓBE. QazAqparat – Aqtóbede turaqtandyrý qorynan satylymǵa shyǵarylǵan kartop sapasy kópshiliktiń synyna ushyrady. Qazir shirigen, buzylǵan kókónistiń qalaı sórege jiberilgeni tekserilip jatyr, dep habarlaıdy QazAqparat tilshisi.

«Aqtóbe áleýmettik-kásipkerlik korporatsııasy» AQ bıyl turaqtandyrý qoryna 1268 tonna kartop saldy. Sharýalardan ár kelisin 62 teńgege satyp alǵan korporatsııa kartopqa 78 mln teńge jumsady.

«Turaqtandyrý qoryna salynǵan azyq-túlik iri sýpermarketter men áleýmettik dúkenderge qoıylady. Kelesi aptada kartop, qyryqqabat, sábiz ben pııaz «Tabys» kommýnaldyq bazaryna jáne sýpermarketterge túsedi. Sapasy týraly aıtar bolsam, depýtattar qoımaǵa baryp, qarap shyqty. Únemi baqylaýda. Sapasyna monıtorıng júrgiziledi. Biz «Gala» tuqymdy sary tústi kartopty saqtandyrý qoryna satyp aldyq. Bálkim almastyryp qoıǵan shyǵar, ol tekseriledi», - dedi «Aqtóbe» áleýmettik-kásipkerlik korporatsııasy» AQ basqarma tóraǵasynyń birinshi orynbasary Anýar Asylov.

Keıin ol tilshilermen birge qaladaǵy sýpermarketti aralady. Onda búlingen, túsi qyzyl kartop satylymda tur.

«Mynaý turaqtandyrý qoryna salynǵan kartop emes. Men sizdermen birge kelip, jańa kórip turmyn», - dedi Anýar Asylov.

Aıta keteıik, saqtandyrý qoryndaǵy kartop qazir dúkenderde kelisine 84 teńgeden satylyp jatyr.