Aqtóbede turaqtandyrý qoryna kókónis jınaldy
AQTÓBE. QazAqparat – Aqtóbede turaqtandyrý qoryna 240 mıllıon teńgeniń ónimi jınaldy, dep habarlaıdy QazAqparat tilshisi.
Aqtóbedegi turaqtandyrý qoryna kókónis salynyp boldy. Aqtóbelik sharýalar qoımalarǵa 3 myń 600 tonnadan astam ónim jetkizip berdi. Qorda 2 myń 339 tonna kartop, 535 tonna pııaz, 419 tonna sábiz jáne 319 tonna qyryqqabat bar. Bul byltyrǵydan eki ese kóp kókónis. Búgin óńirlik turaqtandyrý qoryn qalyptastyrý jónindegi komıssııa músheleri kókónis saqtaý qoımasyna kelip, qysqy azyqtyń sapasyn tekserdi. Kartop, pııaz, sábiz ben qyryqqabattyń sapasy tekserýshilerdiń kóńilinen shyqty.
«Qorǵa ónimdi «SHF Prıgorodnyı», «Bolat LTD» jáne «Elaman-2014» JShS-i jetkizdi. Sońǵy ekeýi 200 tonnadan kartop tapsyrdy. Bul kókónister jazǵa sheıin molynan jetýi kerek. Ónim sharýalardyń qoımalarynda saqtalady. Qazan aıynyń ortasynan beri kókónisterdi «Tabys» kommýnaldy bazarynda, shaǵyn bazarlar men shaǵyn kóterme saýda dúkenderi men jármeńkelerinde satyp jatyrmyz. Kartop, sábiz, qyryqqabattyń kelisi turaqtandyrý qorynan 67 teńgeden, al pııaz 62 teńgeden jiberiledi. Satýshylar ústemeaqysyn 15 paıyzdan asyrmaýy tıis», - dedi «Aqtóbe» ÁKK agroónerkásip kesheni jáne azyq-túlik qaýipsizdigi departamentiniń bas menedjeri Mırambek Anarov. Bıyl turaqtandyrý qoryn kókónispen toltyrý úshin 240 mln teńge bólindi.
