Aqtóbede turaqtandyrý qoryndaǵy kókónistiń sapasy tekserildi
AQTÓBE. KAZINFORM – Aqtóbede kartop, sábiz, pııaz sapasyn jýrnalısterge kórsetti. Munda saqtalǵan ónim iri sýpermarketter men kommýnaldyq dúkenderde ǵana satylady.
«Aqtóbe» ÁKK» AQ-y «Prıgorodnyı» AShF» JShS, «Bolat LTD» JShS, «Arman» ShQ-ymen arada kelisimshart jasady. Jergilikti taýar óndirýshiler kókónisti saqtap, turaqtandyrý qoryna jóneltedi. Bul óńirdegi azyq-túlik qaýipsizdigin qamtamasyz etýge arnalǵan sheshim.
- Jergilikti taýar óndirýshiden kartop 93 teńgege satyp alynady. Ony saýda oryndaryna jetkizgende baǵa 106 teńge bolady. Al saýda ústemesimen tutynýshylarǵa 116 teńgeden usynylady. Qazirgi kezde 18 kommýnaldyq dúken men iri eki sýpermarket bólimderinde kartop satylymǵa shyqty. Jalpy bıyl barlyǵy 4794 tonna kartop saqtalady. Oǵan 486 mln teńge qarjy bólindi,- dedi «Aqtóbe» ÁKK» AQ Azyq-túlikpen qamtamasyz etý departamentiniń dırektory Erlan Nurkeev.
Bir eskere keterligi, alypsatarlardyń jolyn kesý úshin bir adamǵa 5 keli ǵana kartop tıesili. Qazirgi kezde bazarlarda ózge taýar óndirýshiler jetkizgen kartop 270-300 teńgeden satylyp jatyr.
Aıta keteıik, azyq-túlik baǵasyn turaqtandyrý úshin elimizde 19 túrli taýar turaqtandyrý qoryna saqtalady. Aqtóbede bul maqsatqa 4,5 mlrd teńge qarjy bólingen. 7340 tonna un, 25,7 tonna qaraqumyq, 592,8 tonna qant, 35 tonna kúrish saqtaýly. Qorǵa 384 tonna sábiz saqtaý úshin 54,6 mln teńge, 400 tonna pııazǵa 37,6 mln teńge, 441,7 qyryqqabatǵa 35,3 mln teńge bólindi. Muny saqtaý taýar óndirýshilerdiń ózine júktelgen. Kelisim boıynsha kúrish kelisi 420 teńge, ósimdik maıy 480 teńge, qant 420 teńgege satylady.
Eske salsaq, Aqtóbe oblysynyń 2025-2027 jyldarǵa arnalǵan bıýdjeti — 1,5 trln teńge. Onyń 439,3 mlrd teńgesi 2025 jyldyń bıýdjeti.