Aqtóbede turaqtandyrý qoryndaǵy kartop satýǵa shyǵaryldy

AQTÓBE. KAZINFORM - Óńirde kartoptyń kelisi 207-210 teńge bolyp ketti. Bir aı buryn kelisi 160-180 teńge bolǵan.

Aqtóbe oblystyq Aýyl sharýashylyǵy basqarmasynyń habarlaýynsha, turaqtandyrý qoryna saqtalǵan kartop áleýmettik dúkenderde satyla bastady. Sebebi óńirde kókónistiń bul túriniń baǵasy kóterilgen.

- Áleýmettik mańyzy bar azyq-túlik turaqty baqylaýda. Baǵa ósý dınamıkasy baıqalǵanda ónim saýda núktelerine shyǵarylady. Qazirgi tańda kartop baǵasynyń ósýi baıqalyp, qordaǵy ónim áleýmettik dúkenderge shyǵaryldy. Kelisi - 165 teńge, - dep jazdy Aqtóbe oblystyq Aýyl sharýashylyǵy basqarmasy áleýmettik jelidegi paraqshada.

Forvardtyq kelisimshart aıasynda bıyl 9036 tonna kartop, 1478 tonna pııaz, 2078 tonna sábiz, 2202 tonna qyryqqabat saqtaý josparlandy. Sonymen birge qaraqumyq, ósimdik maıy, qant, kúrish saqtaýly.

Aıta keteıik, barlyq óńirde kókónisterdi satyp alý jumystary tolyǵymen aıaqtaldy. Kókónister men sıyr eti baǵalaryn turaqtandyrý maqsatynda Aýyl sharýashylyǵy mınıstrligi men ákimdikter halyqtyń úsh aılyq suranysyna sáıkes satyp alý kólemin 30%-dan 50%-ǵa deıin ulǵaıtty.