Aqtóbede Turaqtandyrý qorynan aptasyna 100 tonnaǵa jýyq kartop jiberilip jatyr

AQTÓBE. KAZINFORM — Aqtóbege jylyna 96 myń tonna kartop qajet. Jergilikti sharýalar tek teń jartysyna jýyǵyn ǵana qamtamasyz etip otyr. Bul joly elimizdiń úsh óńirine suranys joldandy.

Aqtóbeniń Turaqtandyrý qorynda 1420 tonna kartop bar. Kún saıyn áleýmettik dúkender men «Tabys» kommýnaldyq bazaryna 7 tonna kókónis jetkizilip jatyr. Al «Arman» ShQ jáne «Prıgorodnyı» JShS-i iri sýpermarketterge kún saıyn 22-25 tonna kartop jetkizedi. Bul týraly «Aqtóbe» ÁKK»AQ baspasóz qyzmeti habarlady. Degenmen bul óńir suranysyn tolyq qamtýǵa jetpeıdi.

— Óńirde 3 myń gektar jerge kartop egildi. Jeke qosalqy sharýashylyqtarda 22 myń tonna, uıymdastyrylǵan sharýashylyqtarda 27 myń tonna ónim aldy. Oblysta 900 myń halyq bolsa, bizge 96 myń tonna kartop kerek. Bul tek 50-60 paıyzyn ǵana jabady. Qala turǵyndarynyń sany 716 myń turǵyn bolsa, 60-70 paıyzynyń suranysyn qamtıdy, — dedi oblystyq aýyl sharýashylyǵy basqarmasy basshysynyń orynbasary Aıbat Erbazıev.

«Aqtóbe» ÁKK» AQ-y basqarma tóraǵasynyń orynbasary Baýyrjan Amanbekovtiń aıtýynsha, eger kartop sapasy talapqa saı bolmasa, jetkizýshige keri qaıtarady. Al saýda oryndary sórege shyǵarsa, demek oǵan sol kásipkerlik sýbektisi jaýapty bolady.

— Turaqtandyrý qory naryqtaǵy suranysty túgel qamtýǵa arnalmaǵan. Qor tapshylyq týyndaǵan kezde ónimdi sórege shyǵarady. Jeltoqsan aıynan bastap ınterventsııa jasaldy. Aptasyna 100 tonna kókónis shyǵaryldy. Ótken maýsymnyń qazan-sáýir aılary aralyǵynda 312 tonna kartopty satýǵa shyǵardy. Al bul joly qazan-qańtar aılary aralyǵynda 360 tonnaǵa jetip tur. Ósim bar ekenin kórýge bolady. Ótken aptada ǵana 97 tonna kartop shyǵaryldy. Qosymsha qajet bolsa, jiberemiz, — dedi «Aqtóbe» ÁKK» AQ-y basqarma tóraǵasynyń orynbasary Baýyrjan Amanbekov.

Aıta keteıik, baǵany turaqtandyrý úshin Aqtóbe Qaraǵandy, Pavlodar, Qostanaıdan kartop aldyrady. 

— Reseıden kartop tasymaldaý toqtap qaldy. Qazirgi kezde osy suraqtyń sheshimi qarastyrylyp jatyr. Negizgi óńirge qajetti kartoptyń 20-30 paıyzy Reseıden ákelinedi. Bul úlken kólem emes. Taǵy bir aıta keterligi, «kartop azaıyp jatyr» degendi estigen adamdar da jıi satyp alyp jatyr, — dedi Aqtóbe oblystyq kásipkerlik basqarmasy basshysynyń orynbasary Dýman Dáýletııarov.

Eske salsaq, Aqtóbede bir kúnde kartop baǵasy 100 teńgege qymbattap ketti.

Keıin ákimdik onyń sebebin túsindirdi.