Aqtóbede túngi reıd kezinde jasóspirimderden pyshaq pen bıta tabyldy
Aqtóbe polıtsııasy túngi reıd kezinde 70-ke jýyq jasóspirimdi bólimshege jetkizdi. Olardan pyshaq, bıta men oıynshyq tapansha tabyldy, dep habarlaıdy Kazinform.
Aqtóbeniń ıývenaldyq polıtsııa qyzmetkerleri eki kún túngi reıdke shyǵyp, 70-ke jýyq jasóspirimdi bólimshege jetkizdi.
Onyń kóbi turǵyn úıdiń aýlasynda, kompıýterlik klýbtar men kóshede ata-ana qaraýynsyz júrgen.
— Olardan 2 pyshaq, bir bıta, 1 gaz ballony jáne shyn qarýǵa uqsas oıynshyq tapansha tárkilendi. 16 jastaǵy kolledj stýdentinen jınalmaly pyshaq tárkilendi. Taǵy bir kolledj stýdenti bıta alyp júr. Polıtseıler kámeletke tolmaǵandardyń ata-analaryn jáne oqý oryndarynyń basshylyǵyn polıtsııa bólimine shaqyryp, olarǵa túsindirý jumysyn júrgizdi, — dedi Aqtóbe oblystyq PD baspasóz qyzmetiniń jetekshisi Erbolat Sarqulov.
Zań boıynsha saǵat 23:00–den keıin balalaryn baqylaýsyz jibergen ata-analar ákimshilik jaýapqa tartylyp, 3 AEK mólsherinde aıyppul salynady.
— Keıde ata-analar bizge renjıdi. Olar «odan da qylmyskerlerdi nege ustamaısyńdar» dep shý shyǵarady. Kámelet jasqa tolmaǵan bala kez kelgen ýaqytta ózge ortaǵa túsip, shýǵa boı aldyrýy múmkin. Bizdiń maqsatymyz — balalardy qorǵaý, — dedi Aqtóbe qalasy PB ıývenaldyq polıtsııa bólimshesiniń bastyǵy Botakóz Jalekesheva.
Eske salsaq, Aqtóbe áleýmettik jeli arqyly sózge kelip qalǵan kámelet jasqa tolmaǵandar jappaı tóbelesip, eki stýdent kóz jumǵan edi.
