Aqtóbede túnde kóshede qydyryp júrgen 500 jasóspirim polıtsııa bólimine jetkizildi
AQTÓBE. QazAqparat - Aqtóbede «Túngi qaladaǵy balalar» atty jedel aldyn alý sharasy ótti. On kúnde 500 jasóspirim polıtsııa bólimine jetkizildi, dep habarlaıdy QazAqparat tilshisi.
Jasóspirimder arasynda qylmystyń aldyn alý, olardyń túnde zańdy ókilsiz júrmeýin jáne oıyn-saýyq oryndaryna barmaýyn qamtamasyz etý maqsatynda reıd ótti. Sonymen qatar kámeletke tolmaǵandarǵa alkogol, temeki ónimderin satý faktilerin anyqtaý baǵytynda jumys atqaryldy. Reıd 21-30 tamyz aralyǵynda oblys aýmaǵynda «Túngi qaladaǵy balalar» atty jedel aldyn alý sharasy ótti.
«Jedel aldyn alý sharasy barysynda ıývenaldy polıtsııa ınspektorlary aýlalarda, saıabaqtarda, jergilikti jerlerde jáne jastar kóp jınalatyn oıyn-saýyq oryndarynda reıdtik qadaǵalaý jumystaryn júrgizdi.
Jedel aldyn alý is-sharasynyń nátıjesinde ishki ister bólimine 537 kámeletke tolmaǵan bala jetkizildi. Onyń ishinde 508-i óz úıinen tys jerde zańdy ókilsiz júrgen. 28 ata-ana bala tárbıesinde óz mindetterin atqarmaǵany úshin ákimshilik jaýapqa tartyldy. Polıtsııa esebine 47 kámeletke tolmaǵan jasóspirim jáne 40 qolaısyz otbasy qoıyldy», - dedi oblystyq PD baspasóz qyzmetiniń jetekshisi Erbolat Sarqulov.
