Aqtóbede «Týǵan jer» forýmy bastaldy
Álemniń ár túkpirinde júrgen aqtóbelikter týǵan jerge jınaldy. Elimizdiń ár óńirinde júrgen tanymal azamattar da Aqtóbege keldi. QR Memlekettik hatshysy Gúlshara Ábdiqalyqova ósken ólkege jınalǵan aqtóbelikterdi quttyqtap, el ishinde atqarylyp jatqan isterge toqtaldy.
«Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty baǵdarlamalyq maqalasy qoǵamdyq sanany jańǵyrtatyn aýqymdy isterge jol ashyp berdi. Rýhanı jańǵyrý - Qazaqstannyń múldem jańa sıpattaǵy býynyn qalyptastyratyn biregeı joba. Árbir otandasymyz zaman talabyna saı alty qasıetke ıe bolýy kerek. Uly dala eliniń azamattary básekege qabiletti, pragmatık, bilimdi, evalıýtsııalyq damýdy jaqtaıtyn, ashyq, sanaly urpaq bolýy kerek. Bul el-jurtymyzdyń myqty ári jaýapkershiligi joǵary birtutas ultqa aınalýyna, Qazaqstannyń álemdegi eń ozyq 30 eldiń qataryna qosylýyna tikeleı yqpal jasaıdy dep bilemiz», - dedi Memlekettik hatshy Gúlshara Ábdiqalyqova.
Eske salsaq, forýmǵa elimizdegi birqatar mınıstrlik ókilderi men oblys ákimderi qatysty. Olar «Rýhanı jańǵyrý» baǵdarlamasy aıasynda Aqtóbede atqarylyp jatqan istermen tanysý maqsatynda keldi. Mundaı aýqymdy shara elimizde alǵash ret ótkizilip otyr. Aqtóbege álemniń 21 elinen 300-den astam adam keldi. Olar forým kezinde «Týǵan jerge taǵzym» aktsııasy aıasynda salynyp jatqan «Jubanovtar álemi» ortalyǵymen tanysady. Munda aǵaıyndy Jubanovtardyń jeke zattary men týyndylary saqtalady.
«Elimizde týǵan jerine qamqorlyq kórsetip júrgen adamdar bar. Aqtóbelikter arasynan «Jubanovtar álemi» ortalyǵynyń qurylysyn júrgizip jatqan kásipker Qaırat Máıtekovti atap óteýge bolady. Ol 300 mıllıon teńge qarjy bóldi. Sonymen qatar, kásipker Gleb Şegelskıı «Hokkeı modýlin», «Altyn Qyran» tobynyń quryltaıshysy Islambek Saljanov Aqtóbe oblystyq tarıhı-ólketaný mýzeıin salyp jatyr. Bul óte aýqymdy jumys», - dedi Memlekettik hatshy Gúlshara Ábdihalyqova.
Forým qonaqtary Densaýlyq saıabaǵyn qaraıdy. Bul saıabaq elimizde densaýlyq saqtaý qyzmetkerleriniń óz usynysymen ashylǵan eń alǵashqy saıabaq. Munda 1500 túp aǵash otyrǵyzylyp, fýtbol alańy, ústel tennısi salyndy. Velojol da bar.
