Aqtóbede trıatlon parki ashyldy
Aqtóbe qalasyndaǵy Tuńǵysh Prezıdent saıabaǵy aýmaǵynda qala turǵyndary men qonaqtarynyń sportpen aınalysýyna jáne demalýyna qolaıly jaǵdaı jasalǵan trıatlon parki ashyldy.
Trıatlon parkinde uzyndyǵy 2,4 shaqyrym bolady. Munda velosıpedpen júretin jáne júgiretin jol, sport ǵımaraty bar. Onda trıatlon, velosıped sporty men jeńil atletıka sektsııalary kiriktirilgen úsh zal ornalasqan.
Sonymen qatar ǵımaratta sport bary bolady. Velosıped jóndeıtin servıs ornalasady. Velosıped, shańǵy, konkıdi jalǵa alýǵa bolady.
Parktiń ashylýy aıasynda «Ekıden» jeńil atletıka jarysy ótip, oǵan Oral, Atyraý, Nur-Sultan jáne Aqtóbe qalasynan kelgen otyz komanda atsalysty. Parktiń ashylýyna oblys ákimi Ońdasyn Orazalın, metsenat ári Berik Qanıev jáne QR Trıatlon federatsııasynyń prezıdenti Aldııar Qaztaev qatysty.
«Búgin bizdiń el Memlekettik rámizder kúnin atap ótti. Osyndaı mártebeli mereke kúni Aqtóbe jerinde ótkizilip jatqan erekshe sharanyń biri Aqtóbe qalasyndaǵy trıatlon parkiniń ashylý saltanaty. Osy tektes trıatlon parki elimizde sanaýly ǵana iri qalalarda qoldanysta. Jalpy oblys kólemindegi barlyq aımaqda birqatar sporttyq keshen boı kóterdi. Shalǵaı aýyldarda da qazirgi ýaqytta sporttyń kez kelgen túrimen aınalysýǵa tolyqtaı múmkindik bar. Eger ótken jyly oblysta 60 jańa nysan paıdalanýǵa berilse, bıylǵy jyly 90-ǵa jýyq sport nysandaryn qoldanysqa berýdi josparlap otyrmyz»,- dep atap ótti Ońdasyn Orazalın.
Trıatlon parki qala men oblystyń belsendi turǵyndaryn sportpen jáne dene shynyqtyrýmen aınalysýǵa tartatyn jańa orynǵa aınalady. Parkke barlyq kelýshi tegin kire alady.
