Aqtóbede tozyǵy jetken lıft kóbeıdi
Aqtóbe qalasyndaǵy lıft sharýashylyǵynyń jaǵdaıy talqylandy. «Atqarýshy organ retinde turǵyndardyń qaýipsizdigi jan-jaqty qamtamasyz etilýi qajet. Kópqabatty úılerdiń turǵyndary tarapynan jedelsatylardyń sapasyna qatysty shaǵymdar túsýde», - dedi óńir basshysy Ońdasyn Orazalın.
Aqtóbe qalasynyń ákimi Ashat Shaharovtyń aıtýynsha, 305 kópqabatty turǵyn úıde 605 lıft paıdalanylady. Ondaǵy 259 lıfttiń paıdalaný merzimi 25 jyldan asqan. «Óńirlerdi damytýdyń 2020 jylǵa deıingi» baǵdarlamasy aıasynda jergilikti bıýdjet esebinen olardy aýystyrý jumystary júrgizilip jatyr.
«2020 jyly 920 mln teńgege 100 lıfti kúrdeli jóndeý boıynsha ótinim ázirlengen. Onyń ishinde 16 lıft shuǵyl jóndeýdi qajet etedi jáne qazirgi ýaqytta paıdalanylmaı tur. Tozǵan lıftterdi aýystyrý boıynsha túrik ınvestorlary usynys bildirgen. Alaıda olar ornatatyn lıft kólemi turǵyn úılerdiń shahtasyna sáıkes kelmegen. Sondyqtan «Qaz-Bel Lıft« JShS, «Jiger« JShS, «Mogılev Lıft Mash« JShS syndy jergilikti kásiporyndarmen birlese jumys isteý josparlandy», - dep habarlady oblys ákimniń baspasóz qyzmeti. Sonymen birge Alǵa aýdanynda isten shyqqan lıftiler máselesi bar.
«100 lıftti aýystyrý - úlken jaýapkershilik. Tozyǵy jetken lıftterge qatysty aýdan ákimderi de naqty usynystar ázirlesin. Qaladaǵy turǵyn úılerdiń jedelsatylary múmkindiginshe tez arada aýystyrylý qajet», - dep atap ótti Ońdasyn Orazalın.
