Aqtóbede tozyǵy jetken káriz-tazartý stansasynyń ornyna jańasy salynyp jatyr
AQTÓBE. KAZINFORM — Qurylys jumystary úsh jylǵa sozylady. Bıyl bastalyp, 2028 jyly kóktemde aıaqtalýǵa tıis.
Aqtóbe qalasynda káriz-tazartý stansasynyń jobasy birneshe jyl buryn jasalyp, qurylys bıyl ǵana bastaldy. Qurylys jumystary kezinde 350 adam jumys isteıdi. Jańa stansanyń artyqshylyǵy — aǵyndy sý tórt satyly tazartýdan ótedi.
— Qazir jumys istep turǵan káriz-tazartý stansasynda aǵyndy sý mehanıkalyq jáne bıologııalyq tazartýdan ótti. Jańasynda tórt deńgeıli tazartý bolady. Tazartylǵan sýdy balyq sharýashylyǵyna qoldanýǵa múmkindik bar. Taǵy bir aıta ketetin jaıt, eski káriz-tazartý stansasy táýligine 130 myń tekshe metr aǵyndy sý qabyldaýǵa qýatty. Qazir 70 myń tekshe metr qabyldap tur. Kóp degende táýligine 90-95 myń tekshe metr sý keledi, — «Aqtobe su-energy group» AQ bas dırektory Naǵymjan Aldııarov.
Eski káriz-tazartý stansasynda tazartýdan ótken sý kóktem saıyn Elek ózenine aǵyzylyp tur. Al jańasynda sý tehnıkalyq maqsatta qoldanýǵa jaramdy bolmaq. Ol úshin qosymsha joba ázirlenedi. Taǵy bir másele — jaǵymsyz ıis. Jańa káriz-sorǵy stansasy bul máseleni túbegeıli sheshpeıdi, alaıda ıisti azaıtýy múmkin.
— Tórtinshi deńgeıdegi tazartý kezinde bıogaz túziledi. Odan elektr qýaty óndireledi. Bul káriz-tazartý stansasy qajettiliginiń 30% qamtamasyz etedi. Al untaq aýyl sharýashylyǵy salasynda tyńaıtqysh retinde qoldanylady, — dedi N.Aldııarov.
Aıta keteıik, Aqtóbedegi káriz-tazartý stansasynyń jobalyq quny — 53,5 mlrd teńge. Alaıda qurylys jumystaryna 43 mlrd teńgeden asa qarjy jumsalady. Qarjy Eýropalyq qaıta qurý jáne damý banki arqyly bólindi. Memleket kepil bolyp otyr jáne qarjy 15 jylda qaıtarylady. Aldaǵy ýaqytta qarjynyń 90 paıyzy respýblıkalyq, 10 paıyzy jergilikti bıýdjet esebinen jabylady. Aqtóbede ázirshe aǵyndy sý tarıfin kóterý suraǵy qarastyrylyp jatqan joq.
Eske salsaq, Aqtóbedegi káriz-tazartý stansasynyń tozý kórsetkishi 70% jetip tur. «Aqtóbe qalasynyń káriz tazartý qurylystarynyń qurylysy» jobasynyń tehnıkalyq-ekonomıkalyq negizdemesi 2023 jyly salalyq saraptamadan ótti.
