Aqtóbede toı ótkizý toqtamaı tur
AQTÓBE. QazAqparat – Aqtóbede toı, sadaqa ótip jatyr. Shekteý sharasy kúsheıtilgenimen, adamdar úıge qonaq shaqyrýyn toqtatpady, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Oblys ákimdiginde epıdemıologııalyq ahýal sóz boldy. Jıynǵa oblys ákiminiń orynbasarlary, basqarma basshylary, vıdeokonferentsııa rejıminde qala, aýdan ákimderi qatysty.
Óńir basshysynyń birinshi orynbasary Nurjaýǵan Qalaýov óńirdegi epıdemıologııalyq jaǵdaıdy baıandady.
Onyń aıtýynsha, indetke shaldyqqandardyń artýyna shekteýdiń jeńildeýi, skrınıg ótkizý sharasyna jáne sanıtarııa talabyn saqtamaý — sebep. Óńirde 5 oblystyq, 2 qalalyq jáne 76 aýdandyq, aýyldyq monıtorıng toby qurylǵan. Olar 1700-den astam nysandy tekserdi. Kóbine kireberistk pırometr jáne sanıtaızer quraldary bolmady, araqashyqtyqty saqtamady.
Oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva eshqandaı tyıymǵa qaramastan dástúrli sharalar ótip jatqanyn aıtty.
Aımaq basshysy qaýipsizdik jumysy mańyzdy ekenin, degenmen turǵyndardy tym qyspaqqa alýdyń keri áseri baryn jasyrmady.
«Tótenshe jaǵdaı kezinde aqtóbelikter barynsha tártip saqtady. Qazir de jumys ýaqytyn qarastyrý júkteldi. Meniń oıymsha, ýaqytty shektegen saıyn kóp jınala beredi. Demalatyn ýaqytta sýburqaqtardy óshirip tastaý máselesin de qaıta qarastyrý qajet. Shekteý men tyıymdar aqylǵa qonymdy bolýy tıis. Qoǵamdyq kólikterdiń júrý ýaqytyn uzartyp, azamattardyń kóp shoǵyrlanýyn boldyrmas úshin kersinshe olardyń júrip turýyna múmkindik berý kerek», - dedi Ońdasyn Orazalın.
Óńir basshysynyń bul pikirin oblystyq polıtsııa departamenti basshysynyń birinshi orynbasary Qanat Álıev te qoldady. Departament ókilderi toı-jıyn ótkizýdiń tártibin birlese sheshedi.
