Aqtóbede toı kortejin uıymdastyrǵandar ákimshilik jaýapqa tartyldy
AQTÓBE. KAZINFORM — Olar kóliktiń terezesinen shyǵyp, densaýlyǵyna qaýip tóndirgen. Júrgizýshi rólde otyryp uıaly telefonmen sóılesken, qaýipsizdik beldigin taqpaǵan.
Aqtóbe oblystyq PD áleýmettik jelidegi toı kortejiniń vıdeosyna taldaý júrgizip, anyqtalǵan buzýshylyqtardy tirkedi. Úılený toıy kortejine qatysqandar jol qozǵalysy erejelerin óreskel buzǵan.
— Beınematerıalda kólik jolaýshylarynyń qozǵalys kezinde avtokóliktiń terezesinen shyqqany, júrgizýshilerdiń rólde uıaly telefon paıdalanǵany jáne qaýipsizdik beldigin taqpaǵany kórinedi. Mundaı áreketter jol qozǵalysynyń barlyq qatysýshylaryna qaýip tóndiredi. Muǵaljar aýdandyq polıtsııa bóliminiń qyzmetkerleri kortejge qatysqan kólik júrgizýshileri men jolaýshylardyń barlyǵyn anyqtady. Quqyq buzýshylardyń barlyǵy zańnamaǵa sáıkes ákimshilik jaýapqa tartyldy. Bir kólik arnaıy turaqqa qoıyldy, — dep habarlady oblystyq PD baspasóz qyzmeti.
Buǵan deıin habarlaǵanymyzdaı, Jezqazǵanda jol erejesin buzyp, toı kortejin uıymdastyrǵandar jaýapqa tartyldy. Atyraýda da toı kortejinde jol erejesin buzǵan 8 júrgizýshi anyqtaldy.
