Aqtóbede toı kezinde myltyq atqan jastardan qarý tárkilendi
AQTÓBE. QazAqparat - Aqtóbede toı kezinde aspanǵa myltyq atyp, bir-birin qoldaǵan jastardan qarý tárkilendi. Qylmystyq is qozǵalyp, tergeý bastaldy, dep habarlaıdy QazAqparat tilshisi.
Aqtóbe oblysy, Shalqar aýdanynyń jastary toı kezindegi serýende qarýdan oq atqan beınejazba áleýmettik jelige tarap ketti. Kóptiń talqysyna túsken kórinisten soń tergeý bastalyp, 22 jastaǵy aýyl turǵynynan qarý tárkilendi.
«Shalqar qalasyndaǵy Áıteke bı kóshesi kól jaǵasynda ornalasqan. Jastar úılený toıy kezinde kól jaǵasyna aıaldap, ańshy myltyǵynan oq atqan. Osy oqıǵa boıynsha Shalqar aýdandyq Іshki ister bólimi QR QK-niń 287-baby, 2-bóligine sáıkes, ıaǵnı, «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baby boıynsha sotqa deıingi tergeý bastaldy. Búgin 22 jastaǵy Shalqar qalasynyń turǵynynan 16 kalıbrli «IJ-K» markaly ańshy myltyǵy zattaı aıǵaq retinde alyndy. Ańshy myltyǵyna sot-ballıstıkalyq saraptama taǵaıyndaldy»,- dep habarlaıdy oblystyq ІІD baspasóz qyzmeti.
