Aqtóbede tótenshe jaǵdaılar qyzmetkeri men tártip saqshylary marapattaldy
AQTÓBE. QazAqparat - Aqtóbede tótenshe jaǵdaılar qyzmetkeri Nurtilek Qarabalın, tártip saqshylary Muratbek Nurmaǵanbetov pen Erbolat Jańabaev marapattaldy, dep habarlaıdy QazAqparat tilshisi.
Aqtóbe oblysy TJD bastyǵy azamattyq qorǵaý polkovnıgi Marǵulan Amanbaev Baıǵanın aýdandyq TJB aǵa ınjeneri Nurtilek Qarabalınge «Batyl júrek» nomınatsııasy men Nursultan Nazarbaev qorynyń Alǵys hatyn tabystady. Nurtilek Shamǵonuly 2020 jylǵy qańtar aıynda 4 avarııalyq-qutqarý, 1 izdestirý-qutqarý jumystaryna shyǵyp, qar qursaýynda qalǵan jalpy sany 35 avtokólikti qaýipsiz aımaqqa kóshirýge jáne joǵalǵan azamatty izdep-tabýǵa eleýli úles qosty.
«Qutqarýǵa barǵanda kishkentaı balalardy da kórdim. Olardy aman-esen shyǵaryp alyp, adamdardy jylytý beketterine jetkizdik. Bul bizdiń mindetimiz. Al biz boryshymyzdy adal atqaramyz», - dedi Nurtilek Shamǵonuly.
Sondaı-aq oblystyq PD qyzmetkerleri Muratbek Nurmaǵanbetov pen Erbolat Jańabaev TJM «Tótenshe jaǵdaıdaǵy erligi úshin» tósbelgisi berildi. Olar bıyl qysta Aqtóbe qalasynda Qarǵaly turǵyn alabynda ornalasqan kópqabatty úıdiń jertólesinen bir adamdy aman alyp shyqty. Zardap shegýshini qaýipsiz jerge evakýatsııalap, dárigerler kelgenge deıin qajetti medıtsınalyq kómek kórsetti.
