Aqtóbede tótenshe jaǵdaılar qyzmeti saıajaılardaǵy úılerdiń peshin teksere bastady
AQTÓBE. QazAqparat - Aqtóbede tótenshe jaǵdaılar qyzmeti reıdke shyqty. Jyl basynan beri jeke turǵyn úılerde 17 órt tirkeldi, dep habarlaıdy QazAqparat tilshisi.
Aqtóbe qalasynda tótenshe jaǵdaılar qyzmeti qaýipsizdik sharasyn kúsheıtip, turǵyndarǵa ot jaǵý erejesin úıretip jatyr. Jyl basynan beri 33 órt tirkelse, onyń 17-i turǵyn úıde boldy. Barlyǵy 12 kólikten órt shyqty. Aqtóbe qalalyq tótenshe jaǵdaılar basqarmasynyń basshysy Aıbat Jańabergenovtyń aıtýynsha, jyl basynan beri peshtiń murjasy tazartylmaı, 7 adam ýlandy.
«Gaz kirmegen úıler ot jaǵady. Olar qarapaıym erejelerdi saqtaýy tıis. Máselen, peshtiń aldyna temir tóselýi kerek. Murjada sańylaý bolmaǵanyn baqylaǵan jón. Aıyna eki ret murja tazartylady. Balalardyń ózderin ǵana úıde qaraýsyz qaldyrýǵa bolmaıdy», - dedi A. Jańabergenov.
Aıta keteıik, Aqtóbede aqpan-naýryz aılarynda «Jaqsylyq jasa» aktsııasy ótedi. Aktsııa kezinde órt sóndirý materıaldary tegin beriledi. Ótken jyly Aqtóbe oblysynda 800-den astam órt tirkeldi. Órttiń materıaldyq shyǵyny 72 mıllıon teńgeni qurady. Órt kezinde barlyǵy 66 adam qaza bolǵan.
