Aqtóbede tótenshe jaǵdaı jarııalanǵan aýyl balalaryna birjolǵy kómek beriledi
AQTÓBE. KAZINFORM – Kómek aýyldaǵy 110 otbasyna tıesili. Onyń ishinde mektep oqýshylaryna jańa oqý jylyna daıyndalýy úshin qarjy qarastyryldy.
Aqtóbe oblysy boıynsha bıyl 16 myńnan astam balaǵa qarjylaı jáne materıaldyq kómek kórsetiledi. Ol úshin bıýdjetten 800 mln teńgeden astam qarjy bólindi. Sonymen birge tótenshe jaǵdaı jarııalanǵan Qaraýylkeldi aýylynyń oqýshylaryna mektepke ázirlenýine kómek beriledi.
- Tabıǵı apat kezinde múlki búlingen otbasy balalaryna da birjolǵy kómek beriledi. Barlyǵy 110 otbasy bar. Bul otbasylarda 202 bala tárbıelenip jatyr. Onyń ishinde 96 bala áleýmettik kómek alýǵa quqyly sanatqa jatady. Qalǵan 106 bala tótenshe jaǵdaı saldarynan qarjylaı jáne materıaldyq qoldaýdy qajet etedi. Soǵan baılanysty balalarǵa birjolǵy kómek qarastyryldy,- dedi Aqtóbe oblystyq bilim basqarmasy basshysynyń orynbasary Nurgúl Bertileýova.
Eske salsaq, qatty daýyl kezinde Qaraýylkeldi aýylynda 254 turǵyn úı, 14 áleýmettik nysan, 24 kásipkerlik sýbektisi jáne 6 ákimshilik ǵımarat zaqymdandy.
Osy aptada Baıǵanınde bilim berý nysandaryn jóndeý bastaldy. №2 jáne №3 Qaraýylkeldi orta mektepteriniń shatyrlary qaıta jabylady.
