Aqtóbede tótenshe jaǵdaı rejimin buzǵandar jazalandy
AQTÓBE. QazAqparat - Aqtóbede tótenshe jaǵdaı rejimin buzǵan 24 derek tirkeldi. Bári ákimshilik jaýapkershilikke tartylady, dep habarlaıdy QazAqparat tilshisi.
Aqtóbede polıtsııa, Ulttyq ulan sarbazdary men áskerı bólim qyzmetkerleri tártipti baqylap, tótenshe jaǵdaı rejiminiń saqtalýyn qadalaǵalap júr. Jaǵdaı birqalypty, qylmys sany óspedi. Polıtsııa qaýipsizdik jumystary kezinde karantınde qoldanylatyn blok beketterdi ázirledi.
«Quqyq qorǵaý salasynda eńbek etetin 2 600 qyzmetker tótenshe jaǵdaı rejiminiń saqtalýyn qadaǵalaıdy. Barlyǵy 40 blok beket daıyndaldy. Onyń 28-i magıstraldi, ózgesi qarapaıym. Qalanyń 23 sektorǵa bólingeni belgili. Eger karantın jarııalansa qajetti shara der kezinde qolǵa alynady. Shekteý qoıylyp, dárigerlerge kómek beremiz. Qazir joldar ashyq», - dedi oblystyq PD bastyǵynyń birinshi orynbasary Qanat Álıev.
Polıtsııa men eriktiler tótenshe jaǵdaı rejiminiń saqtalýyn úzdiksiz baqylaıdy.
Qanat Álıevtiń aıtýynsha, barlyǵy 24 derek tirkeldi. Olar ÁQBtK 476-baby boıynsha ákimshilik jaýapkershilikke tartylady. Qazir oblysta jedel shtab jumys istep tur. Quramynda quqyq qorǵaý organdarynyń qyzmetkerleri de bar.
Tótenshe jaǵdaı rejimin buzǵandar týraly myna telefon nómirine habarlaýǵa bolady: 936139, 936440, 936339.
