Aqtóbede tórt jasóspirim eresekterden zábir kórdi
AQTÓBE. QazAqparat - Jyl basynan beri tórt jasóspirim eresek adamdardan zábir kórdi. Bir jaǵdaıda ógeı áke 10 jastaǵy qyzyna azǵyndyq jasaǵan. Bul týraly búgin prokýror, polıtsııa, bilim salasynyń basshylary men mamandar qatysqan jıynda aıtyldy, dep habarlaıdy QazAqparat tilshisi.
Sońǵy jyldary Aqtóbede jasóspirimder qylmysy eselendi. Oblystyq jergilikti polıtsııa qyzmetiniń bastyǵy Qanat Álıevtiń aıtýynsha, ótken jyly kámeletke tolmaǵandar arasyndaǵy qylmys úsh esege artqan. Máselen, oblys ortalyǵynda 31 qylmys tirkelip, 13 mektep oqýshysy jazalanǵan. Urlyq, tonaý, alaıaqtyq, tóbeleske qatysty derek boıynsha kolledjderdiń 27 oqýshysy tirkeýge alyndy.
Jıyn kezinde oblystyq prokýratýranyń 1 basqarma bastyǵy Qanat Nahymbekov ıÝvenaldy polıtsııa qyzmetiniń eki iri qateligin tizbektedi. Birinshiden, shtat jetispeıdi. Іshki ister mınıstrligi bir ınspektor 500 balaǵa jaýapty dep bekitken. Al Aqtóbede bar bolǵany 128 mektep ınspektory eńbek etedi. Áli 92 adam qajet.
«Inspektorlar qoǵamdyq jumystarǵa qatystyrylyp, ýaqyt joǵaltady. Mektep oqýshylary arasyndaǵy qylmystyń aldyn-alýmen aınalysýy tıis ınspektorlar eresektiń mardymsyz zań buzýshylyq derekterin tirkep, ákimshilik jaýapkershilikke tartyp júr. Keıbir aldyn-alý jumystary qaǵaz júzinde ótedi. Aqtóbe qalasy men Temir, Mártók, Shalqar, Qarǵaly aýdandarynyń ınspektorlary qylmys jasaǵan 5 jasóspirimdi tirkeýge almaǵan. 6 aıdan 2 jasqa deıingi balalary bar jaısyz 18 otbasyn baqylaý jumysy júrgizilmegen. Osynyń bári qylmystyq quqyq buzýshylyqtyń 3 paıyzǵa artýyna sebep boldy»,- dedi Q. Nahymbekov. Onyń aıtýynsha, óńirde jasóspirimderge azǵyndyq jasaý deregi azaımaı tur. Máselen, bıyl jyl basynan beri tórt jasóspirim eresekterdiń azǵyndyǵyna dýshar bolǵan. «Alǵa aýdanynda anasymen birge turatyn er adamnyń 10 jastaǵy qyzǵa azǵyndyq jasaǵany anyqtaldy. Bul týraly oqýshy qyzdyń týysy habarlaǵan. Qazir kúdikti qamaýǵa alynyp, tergeý bastaldy. Aldyn-alý jumystary durys júrgizilse, ýchaskelik ınspektorlar, mektep ákimshiligi men psıhologtar mundaı oqıǵany kúni buryn bilip otyrar edi. Jasóspirimge ata-analar da jaýapty»,- dedi prokýror.
Aıta keteıik, jıyn kezinde oblystyq bilim basqarmasynyń basshysy Sáýle Ómirbekova tártibi nashar balalardyń minezin túzetý úshin qoǵam qaıratkerleri men ataqty sportshy, óner adamdarynyń kómegine júginý nátıje berdi dep otyr. Olar balalardyń ata-analaryna qaraǵanda oqýshylarǵa jaqsy kóńil bólip, belgili bir ýaqytyn arnaıdy eken.
