Aqtóbede tórt táýlikten beri qoqys polıgony byqsyp jatyr

AQTÓBE. QazAqparat – Aqtóbede 7 tamyzda qoqys polıgony janyp, qazirgi kezde alań áli byqsyp jatyr. Munda órt sóndirýshilermen qatar, polıgon qyzmetkerleri jumys istep júr, dep habarlaıdy QazAqparat tilshisi.

7 tamyz kúni saǵat 18:35-te Aqtóbe qalalyq qoqys polıgonynda órt shyǵyp, tótenshe jaǵdaılar qyzmetine habarlama túsedi. Sol kezde oqıǵa ornyna oblystyq TJD-den 6 qyzmetker men eki tehnıka jiberildi. Sonymen birge, qoqys polıgonyna jaýapty seriktestik qyzmetkerleri de jumyldyryldy. Alǵashqy kúni myń sharshy metr jer órtindi.

«Búginde qoqys polıgonyndaǵy turmystyq qatty qaldyq áli byqsyp jatyr. Áli de 3 tehnıka men 14 sóndirýshi jumys istep júr. Al, seriktestik 10 adam men 10 tehnıka bóldi. Eshkim órtep, jaqqan joq dep esepteımiz. Kún ystyq, áınek kúnge shaǵylysyp, ot tutanǵan bolýy múmkin», - dedi Aqtóbe qalasy Astana aýdany TJB bastyǵy Danarbek Imanǵazın.

Aıta keteıik, jyl basynan beri qalalyq qoqys polıgonynda 10 janý deregi tirkeldi. Qoqys polıgonyna jaýapty «Tabys Aqtóbe» JShS-ne 10 hattama toltyrylyp, ákimshilik jaýapqa tartyldy.