Aqtóbede tórt sottyń sýdıasy taǵaıyndaldy
AQTÓBE. KAZINFORM - Taǵaıyndalǵan bes sýdıanyń tórteýi oblys ortalyǵyndaǵy, bireýi Qobda aýdanyndaǵy sottyń sýdıasy. Sonymen birge eki sýdıa otstavkaǵa ketti.
Aqtóbe oblystyq sotyndaǵy jıynda sýdıalar tanystyryldy. Atap aıtqanda Aqtóbe oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy laýazymyna Erjan Qurmanov, Aqtóbe oblystyq sotynyń sýdıalary laýazymyna Juldyz Bımanova jáne Jeńiskúl Sultanova, Aqtóbe qalasynyń №2 sotynyń sýdıasy laýazymyna Damır Pangereı taǵaıyndaldy. Al Nurgúl Saǵyndyq Qobda aýdandyq sotynyń sýdıasy boldy.
- Oblystyq sottyń sýdıasy Qaıyrbek Elemesov jáne Aqtóbe qalasynyń sýdıasy Nurlan Baqtyǵalıev otstavkaǵa shyqty. Sýdıalar korpýsy olardyń kóp jylǵy eńbegin atap ótip, qurmetpen shyǵaryp saldy. Oblystyq sot tóraǵasynyń mindetin atqarýshy Álibek Ahmetov taǵaıyndalǵan sýdıalarǵa sáttilik tilep, sot tóreligin júzege asyrý kezinde ádil ári beıtarap bolýdy eske saldy,- dep habarlady Aqtóbe oblystyq sotynyń baspasóz qyzmeti.
Eske salsaq, naýryzda Aqtóbe qalasynda jáne aýdandarda 12 sýdıa qyzmetke kiristi. Al oblystyq sot tóraǵasy basqa qyzmetke aýysty.
