Aqtóbede tórt muǵalim kóz jumǵan jol apaty: BQO ákimi kóńil aıtty

ORAL. QazAqparat – Batys Qazaqstan oblysynyń ákimi Narıman Tóreǵalıev Aqtóbe oblysy Qobda aýdany aýmaǵyndaǵy jol apatynan mert bolǵan tórt muǵalimniń otbasylaryna kóńil aıtty, dep habarlaıdy QazAqparat tilshisi.

Óńir basshysy bul qaıǵyly oqıǵanyń Batys Qazaqstan oblysy jurtshylyǵyna, bilim salasyna aýyr soqqanyn jetkizdi.

«2023 jyldyń 1 maýsymynda Oral men Aqtóbe arasyn jalǵaıtyn tas jolda jantúrshigerlik apat boldy. Ókinishke qaraı, tórt ustazymyzdan aıyrylyp qaldyq. Bul – orny tolmas qaza. Mezgilsiz qaza tapqan pedagogtar - Oral qalasy №47 jalpy orta bilim beretin mekteptiń defektology Gúljaınat Nurhatqyzy Qajyǵalıevanyń, Kaztalov aýdany K.Meńdálıev atyndaǵy jalpy orta bilim beretin mektebiniń logopedi jáne sýret, syzý pániniń muǵalimi Áıgerim Asqarqyzy Ǵumarovanyń, Oral qalasy psıhologııalyq- pedagogıkalyq túzeý kabınetiniń sýrdopedagogy Aısulý Tilektesqyzy Tilektesovanyń jáne Báıterek aýdany, Novenkıı jalpy orta bilim beretin mektebiniń defektolog mamany Aqsamal Beıimbetqyzy Adıevanyń otbasyna, ata-anasyna, týǵan-týystaryna qaıǵyryp kóńil aıtamyn», - dedi N.Tóreǵalıev.

Eske sala keteıik, budan buryn Aqtóbede 4 adam kóz jumǵan jol apatyna baılanysty kólikte dıplom alýǵa bara jatqan oraldyq muǵalimder bolǵanyn jazǵan edik.

Sondaı-aq Aqtóbe oblysyndaǵy jol apatyna baılanysty tórt muǵalim kóz jumdy, ekeýi jansaqtaý bóliminde jatyr.

Aqtóbe oblystyq kópbeıindi aýrýhanasynyń dáriger travmatology Jasulan Orynbaevtyń aıtýynsha, 1977 jylǵy áıel otbasy jaǵdaıyna baılanysty statsıonarlyq emdelýden bas tartqan.

«1996 jylǵy qyz áli jansaqtaý bóliminde jatyr. Esi kirdi, biraq jaǵdaıy aýyr kúıinde qalyp otyr», - dedi J.Orynbaev.