Aqtóbede tórt aı buryn paıdalanýǵa berilgen mektep qaıta jóndelip jatyr
AQTÓBE. QazAqparat - Aqtóbe qalasy Aqshat aýylyndaǵy orta mekteptiń jertólesine sý tolyp, qaıta jóndeýdi qajet etip tur. Kóktem saıyn sý jınalatyn orynǵa salynǵan mektep janynda sýaǵar qurylysy bastalady, dep habarlaıdy QazAqparat tilshisi.
Ótken jyldyń jeltoqsan aıynda Aqtóbe qalasynda eki orta mektep paıdalanýǵa berilgen bolatyn. Solardyń biri qazir jóndeýdi qajet etip tur. Arada tórt aı ótkende jertólesine sý tolyp, tóbesinen sý aǵyp, qasbeti túse bastady. Bul olqylyq týraly mektep basshylyǵy jaýapty mekemelerge habarlap, qyzmettik hat joldady.
«Aqshat eldi mekenindegi orta mektep 27 jeltoqsan kúni ashylyp, úshinshi toqsanda balalar sabaqqa kele bastady. Mektep jaryq, keń. Al máselege keler bolsaq, 28 naýryz kúni qar erip, mektep jertólesine sý toldy. Qurylys jumystaryn júrgizgen «TreıtInterKom» JShS qaıta jóndeýdi bastady. Kúnde osy jerde, bizben birge júr. Olqylyqtardy tizbektep, qyzmettik hat jazyldy. Aqtóbe qalalyq ákimdigi de sý arnasyn salýǵa arnalǵan jobalyq-smetalyq qujat daıyndaıdy. Eki jyl kepildigi bolǵan soń merdiger kompanııa bárin ózderi retteıdi. Al sýǵa ketken kezde qalalyq ákimdik, bilim bólimi kelip, sý sorý jumysy júrgizildi»,- dedi mektep dırektory Nurjamal Baıdrahmanova BAQ ókilderine bergen suhbatynda. Mektep jertólesi balalar demalysqa shyqqan ýaqytta sýǵa tolǵan. Úzdiksiz sý sorylyp, balalar kelgenshe bilim ordasynyń jertólesi qalpyna keltirildi.
«Qasbetin qaıta jóndep jatyr. Sonymen qatar, sýaǵarlary durys bolmaı, sý ishke aǵyp, merdiger kompanııa jóndedi. Tóbeniń qara qaǵazyn qaıta tósedi»,- dedi mektep dırektory.
Aıta keteıik, mekteptiń qurylys jumystaryna «Nurly jol» baǵdarlamasy arqyly 800 mıllıon teńgeden astam qarjy bólindi. Qurylys jumystary 2017 jyldyń sáýirinde bastalyp, jeltoqsan aıynda aıaqtalǵan. Barlyǵy 300 oqýshyǵa arnalǵan mektepte qazir 200-ge jýyq bala bilim alyp júr.
«Eki jylǵa kepildik bergen soń bárin merdiger kompanııa jóndeıdi. Negizi mektepti qalalyq qurylys bólimi, tehnıkalyq, avtorlyq baqylaýshylar qabyldap aldy. Tek mektep emes, aýyl da saıda ornalasqan. Bıyl sýaǵarlar, sý ótetin joldar salynady»,- dedi Aqtóbe qalalyq bilim bólimi basshysynyń orynbasary Nurlan Turymov.
