Aqtóbede tórt aýyldyń ákimi saılandy
AQTÓBE. KAZINFORM — Temir, Hromtaý jáne Yrǵyz aýdandaryndaǵy aýyl ákimi qyzmetine úmitkerlerdiń eń jasy 29-da boldy. Barlyǵy 12 kandıdattyń tórteýi ákim bolyp saılandy.
Asylan Jánibekuly Yrǵyz aýdany Qyzyljar aýyldyq okrýginiń ákimi bolyp saılandy. Ol «Amanat» partııasy atynan usynylǵan. Aýylda 1200-ge jýyq adamnyń saılaýda daýys berýge quqyǵy bar. Onyń 800-den astamy óz tańdaýyn jasady. Nátıjesinde Yrǵyz aýdany Qurylys aýylynyń turǵyny kóp daýys jınady. Oǵan 493 saılaýshy senim artty.
Sonymen birge Hromtaý aýdany Qudyqsaı jáne Tasótkel aýyldyq okrýgteriniń ákimi saılandy. Qudyqsaı aýyldyq okrýginde saılaýshylar tizimine nebary 181 azamat engizilgen. Olardyń 66-y daýys berdi. Hromtaý aýdandyq aýmaqtyq saılaý komıssııasynyń habarlaýynsha, Murat Taldyqbaev 46 daýys jınap, saılandy. Ol buǵan deıin Qudyqsaı negizgi mektebi dırektorynyń orynbasary qyzmetin atqardy. Al Tasótkel saılaý okrýgi boıynsha saılaýshylar tizimine 281 azamat engizildi jáne olardyń 152-i daýys berdi. «Aýyl» partııasy atynan usynylǵan Asylbek Baımýrzın eń kóp daýys jınady.
Temir aýdandyq aýmaqtyq saılaý komıssııasynyń habarlaýynsha, 36 jastaǵy Raman Rashev Qaıyńdy aýyldyq okrýgi ákimi qyzmetine saılandy. Ol buǵan deıin de osy qyzmetti atqardy. Aýylda saılaýshylar tizimine 417 adam engizilgen bolsa, sonyń 252-i Raman Rashevke daýys bergen.
Aıta keteıik, osy aptada Aqtóbede óz-ózine qol jumsaǵan aýyl ákiminiń ornyna jańasy saılanady. Saılaý 14-maýsymǵa josparlanǵan.
