Aqtóbede Torǵaı ózeninen kelgen sýdyń deńgeıi 1 metrden asty

AQTÓBE. KAZINFORM – Aqtóbe oblysy Yrǵyz aýdanynyń aýyldaryna áli de Torǵaı ózeninen sý kelip jatyr. Bıiktigi 1 metrden asty. 

Aqtóbe oblysynyń Yrǵyz aýdanynda áli de sý tasqyny qaýpi seıilgen joq. Qazirgi kezde Nura aýylyn túgelge derlik sý alsa, Mamyr men Belsherde de sý basqan úıler bar. Al Quılys, Jaısańbaıda aýyl aınalasyndaǵy bógetti bekitý jumysy júrip jatyr.

– Quılys aýyly boıynsha sý tasqynyna qarsy bógeý jumystary júrgizilýde. Qazirgi tańda Torǵaı ózeninen keletin sý deńgeıi 1 metrden asty. Barlyǵy 8 tehnıka bar. Onyń úsheýi KamAZ, tórteýi tıegish jáne bireýi K700. 20982 áskerı bóliminiń 55 áskerı qyzmetkeri, órt sóndirý jáne apattyq-qutqarý jumysy qyzmetiniń 5 adamy sonda. Quılys aýylynda áskerıler sany - 40, aýyl turǵyndaryn qosqanda 80 adamdy quraıdy. Áskerılerdiń 20 adamy Jaısańbaı aýylyna jiberildi. Bógeý jumystary júrgizilýde, - dep habarlady Aqtóbe oblysy ákiminiń baspasóz qyzmeti. 

Eske salsaq Yrǵyz aýdanynda 8 sáýir kúni tótenshe jaǵdaı jarııalandy. Munda Nura aýyly jańa orynnan salynady.