Aqtóbede tońǵan oqýshylar mektepte syrt kıimmen otyrýǵa májbúr
AQTÓBE. QazAqparat - Aqtóbe qalasyndaǵy №24 lıngvıstıkalyq mektep-gımnazııasynyń joǵary synyp oqýshylary sabaqta syrtqy kıimmen otyr. Jel men aıazdy kúni mektep ishi sýytyp ketedi, dep habarlaıdy QazAqparat tilshisi.
Aqtóbe qalasyndaǵy tańdaýly mektepte jylý bar, jylýdy ustap turýǵa múmkindik joq. Terezeden keletin jel men yzǵar oqýshylardy tońdyrǵan soń mektep ákimshiligi olarǵa syrt kıimmen otyrýǵa ruqsat bergen. Oqýshylar birneshe qabat kıim kıip, aıaqtaryn jyly ustaýǵa tyrysady. Biraq tapjylmaı otyrǵan oqýshylar tońyp júrgenderin jasyrmady.
«Mektep ishi salqyn. Otyrǵan soń qolymyzǵa deıin tońyp qalady»,- dedi mektep oqýshysy Serik Ákimjan. Ata-analar da sońǵy ýaqytta qaltyrap keletin balalary úshin alańdap otyr.
Aqtóbe qalasyndaǵy №24 lıngvvıstıkalyq mektep-gımnazııasy 45 jyl buryn salynyp, paıdalanýǵa berilgen. Jylý júıesi jańartylyp, 10 jyl buryn jóndeý jumysy júrgizilgen. Bárin teksere kele eski, aǵash terezelerden jel keletini, jylý batareıalary qanshalyqty ystyq bolǵanymen, bári dalaǵa ketetini anyqtaldy. Mektep keıbir terezelerdi demeýshilerdiń kómegimen jańartyp alǵan. Basym bóligi, ásirese joǵary qabatta eski tereze tur.
«Terezelerdi aýystyrýǵa, jóndeýge qarjy suraǵan edik. 2017 jyly qarjy bólinbedi. 2018 jylǵa da bıýdjetten qarastyrylmaı qaldy. Qarjyny jylý, elektr jelisin jańartýǵa, terezelerdi aýystyrýǵa suraǵan edim»,- dedi №24 mektep-gımnazııasynyń dırektory Ǵalııa Eshmuhanbetova.
Aıta keteıik, Aqtóbe qalalyq bilim bólimi №24 mekteptegi problemany biledi. Olar balalardyń tońatynynan, syrt kıimmen otyratynynan habardar. Biraq dál qaı ýaqytta jóndeý júrgizetinin aıta almady. Aqtóbe qalalyq bilim bóliminiń sektor meńgerýshisi Gúlnaz Myrzaǵalıevanyń aıtýynsha, jóndeý júrgizý úshin aldymen qujattaryn túgeldeýi qajet. Bıyl barlyǵy 8 mektep kúrdeli jóndeýden ótse, oǵan 350 mıllıon teńge jumsalǵan.
