Aqtóbede tokqa túsip qalǵan balanyń ata-anasy kinálilerdiń jazalanýyn suraıdy

AQTÓBE. KAZINFORM – Shalqardaǵy jańa alleıada tokqa túsip, aman qalǵan 10 jastaǵy balanyń ata-anasy kinálilerdiń jazalanýyn suraıdy. Qazir bala emin jalǵastyryp jatyr.

Oqıǵa maýsym aıynda boldy. Oqýshynyń anasy Nazgúl Dýıýsovanyń aıtýynsha, Shalqar aýdandyq ákimdigi Jeńistiń 80 jyldyǵy aıasynda Keńes Odaǵynyń Batyry І.Úrgenishbaevtiń eskertkishi mańyn abattandyryp, jaryq júrgizdi. Balalar da sol mańda oınady.

- Biz kúndegideı jumystamyz, balalar esik aldynda oınaıdy. Saıabaqtyń salǵanyn jaqsy kórdik, ádemilep saldy. Tek onyń eki shamy qurylys kezinde-aq qısaıyp turdy. Birinshisi aldyndaǵysy, ekinshisi qaptalyndaǵysy. Keshkisin jumystan keldik. Bala bolsa oınap ketken. Keshki saǵat 21:15-te bir bala júgirip keldi. «Apa, balańyz tokqa túsip qaldy» dep aıtty. Barsam, bala jerde sulq jatyr. Bir jigit balanyń aýzynan úrlep jatyr. Bir kelinshek «skoryı» dep aıqaılady. Ákesi «Mynaý meniń Nurgeldim ba?» dep aıta berdi. Bilgenimiz, bala qorshaýyna minedi. Qısaıyp turǵan shamdy durystaımyn deıdi. Qolyn kótere bergen kezde tok urady. Bala temirge jabysyp qalady betimen. Kúıik betinde bar. Ákesi tanymaı qaldy. Men shok bolyp turyp qaldym. Bas kıim kıgen er adam eki qolyn sermep, úrlep, urysyp jatyr. «Ne istep tursyńdar, jedel járdem shaqyryńdar» dep. Ol ózi elektrık eken. Ózge shaqyrtýǵa bara jatqan jedel járdem toqtap, kúıik dep kıslorodty daıyndap, aýrýhanaǵa alyp ketti, - dedi anasy.

Tokqa túsken bala aldymen aýdandyq aýrýhanada em qabyldaıdy, keıin oblystyq aýrýhanaǵa sanavıatsııamen jetkizildi. 10 kún em alǵan soń jergilikti jerde emdeýdi jalǵastyrýǵa jiberdi. Qazir jarasyn tańytyp júr.

- Alǵashynda toktyń qaı jerden ótkenin taba almady. Qolyn, aıaǵyn tilip kórdi. Túnde qatty yńyrsyp, aýzynan qan aqqan kezde ǵana tilin kesip qaraǵan. Tok tilden shyǵyp tur. Sol kezde bala tereń dem alyp, qatty uıqyǵa ketken. Erteńine esin sál jıyp, meni izdedi. Sóıtip sanavıatsııamen kelip, Aqtóbe qalasynda em qabyldadyq. KT-ǵa túsirdi, Baýyr, ókpe, júregin tekserdi. Bári saý. Tek betinde iz bolyp tur. Kúıik birden ketpeıdi ǵoı. Jergilikti jerde emdelesiń dep shildede úıge shyqtyq. Sodan beri ákimdik tym-tyrys, eshkim kelmedi, suramady. Qazir balanyń jaǵdaıy jaman emes. Úreı bar, qorqynysh bar. Bul ákimdiktiń jaýapsyzdyǵy. Іs qolǵalyp, tergeý júrip jatyr. Tek saraptama shyqpaı jatyr. Árkim tıisti jaýabyn alýy kerek, - dedi Nazgúl Dýıýsova.

Aqtóbe oblystyq Polıtsııa departamenti baspasóz qyzmetiniń habarlaýynsha, is boıynsha áli de tergeý júrip jatyr, saraptama qorytyndysy shyqpady. Al Shalqar aýdandyq ákimdigi saıabaq toktan ajyratylǵanyn aıtty.

- Bala keldi, Shalqarda. Eshqandaı shaǵymy joq, oınap júr deıdi. Kishkentaı bala ǵoı. Jazylyp kelgen. Anasy emhanada isteıdi eken. Saıasaqta tokty ajyratyp qoıdy, sebebi tergeý júrip jatyr. Adamdar otyra berdi ishinde. Saıabaqqa 11 mln teńge jumsaldy. Oryndyq qoıyldy, arka bar, tal egildi. Adam demalatyn shaǵyn oryn, - dedi Shalqar aýdanynyń ákimi Janbolat Jıdehanov.

Al balaǵa sol aýyldyń turǵyny alǵashqy medıtsınalyq kómek kórsetken. Ol jasandy jolmen tanys alýyna kómek kórsetti.

- Saıabaqqa jaqyndasam, onshaqty adam tur. Qarasam, bir balanyń eki aıaǵy sharbaqta, eki qoly shamnyń tireýinde. Bala tokqa túsip jatqanyn birden bildim. «Ne qarap tursyńdar, túsirip almaısyńdar ma?» dep aıttym. Balany kóterilip alaıyn dep ustaǵanda meni de tok urdy. Bala sharbaqqa jalań aıaq shyqqan eken. Sodan tokqa túsip qalǵan. Jerge túsirgen kezde bala tynys almady, júregi soqpady. Beti appaq, erni kókpeńbek bolyp ketken. Aýzynan kóbik aǵyp jatty. Alǵashqy medıtsınalyq kómek berdim, júregine massaj jasadym. 1 mınýt ótti, nátıje bolmady. Sońǵy ret massaj jasaıynshy dedim. Sol kezde ǵana bala jótelip, demalyp ketti, - dedi shalqarlyq turǵyn.

Ol vıdeoda ózin marapattaıtynyn estigenin, ázirge eshkim habarlaspaǵanyn aıtyp otyr. Ázirge aman qalǵan balanyń ata-anasy rızashylyǵyn bildirdi. 

Eske salsaq, Aqtóbede 9 jastaǵy qyz oıyn-saýyq kesheninde qolynan aıyryla jazdady. Oqýshynyń qoly men saýsaq eti ǵana emes, sińiri de kesilgen. Polıtsııa atalǵan oqıǵaǵa baılanysty tergeý júrgizip jatyr.