Aqtóbede toǵyzqumalaqtan álem chempıonaty bastaldy
Álem chempıonaty 21-27 qarasha aralyǵynda ótedi.
Oǵan AQSh, Aýǵanstan, Bangladesh, Qytaı, Qyrǵyzstan, Ázebaıjan, Ózbekstan, Túrkimenstan, Túrkııa, Mońǵolııa, Úndistan, Pákistan, Ulybrıtanııa, Germanııa, Chehııa, Kolombııa, Latvııa sekildi 20-ǵa jýyq elden 80 sportshy qatysyp jatyr.
Sonymen birge Qazaqstan sportshylary da bar.
«Toǵyzqumalaq tórt myń jyldyq tarıhy bar, aqyl-oıdy damytatyn qazaq halqynyń ulttyq oıyndarynyń biri. Babalarymyz oılap tapqan zııatkerlik sporttyń adamzat órkenıetinen alar orny erekshe. Qazirgi tańda toǵyzqumalaq oıyny álemniń túkpir-túkpirinde tanymal sport túrine aınaldy. 2019 jyly ıÝNESKO-nyń mádenı muralar tizimine endi. 2010 jyly toǵyzqumalaqtan Astana qalasynda birinshi Álem chempıonaty uıymdastyrylsa, VI Álem chempıonaty kıeli meken Aqtóbede ótkeli otyr. Oblysta kásibı turǵyda qarqyndy damyp kele jatqan sport túrimen 20 myńnan asa adam shuǵyldanady. Sońǵy jyldary aımaqtyq reıtıng qorytyndysy boıynsha úzdik úshtikte kelemiz. Ári qaraı oblysymyzda toǵyzqumalaq sportyn damytýǵa barlyq jaǵdaı jasalatyndyǵyn jetkizgim keledi»,- dedi oblys ákimi Eraly Toǵjanov.
Chempıonatqa Dúnıejúzilik toǵyzqumalaq federatsııasynyń prezıdenti Álıhan Baımenov kelip, taıaýda ǵana Latvııada oqý-ádistemelik quraldyń tusaýkeseri bolǵanyn atap ótti.
«Álem chempıonatyna Rýmynııa, Pákistan, Bangladesh komandalary alǵash ret qatysyp otyr. Jarysqa kelgen 20 memlekettiń ókili bolsa, negizinen jarysqa kelgen qazaq dıasporasy emes, sol eldiń turǵylyqty adamdary. Toǵyzqumalaq shyn máninde álemge qanatyn keń jaıdy dep aıta alamyz», - degen Álıhan Baımenov sportshylar, jattyqtyrýshylar, demeýshilerge alǵysyn bildirdi.
Aıta keteıik, jarystyń klassıkalyq túrine – 40 sportshy, blıtske – 40 sportshy jáne rapıd túrine 80-ge jýyq sportshy qatysady.
Qazaqstan namysyn jarystyń klassıka túrinen Ǵalymjan Temirbaev, Beksultan Bostandyqov, Ańsaǵan Qojanásip, Ásel Dalıeva, rapıd túrinen Rınat Kereıbaev, Ermuhamed Áláıdar, Ásel Dalıeva, Uldana Mahambetamın, blıts túrinen Medet Husaıynov, Áset Qaıyrjanov, Gúljanat Aldabergenova, Móldir Serikqyzy qorǵaıdy.
