Aqtóbede tikeleı shetel ınvestıtsııasynyń kólemi shamamen eki esege azaıǵan
AQTÓBE. KAZINFORM – Aqtóbe oblysynda byltyr 9 aıda tikeleı shetel ınvestıtsııasy 337,4 mln dollar boldy. 2023 jyldyń dál osy kezińinde 604,9 mln dollar ınvestıtsııa tartylǵan. Oblystyq ındýstrııaldyq-ınnovatsııalyq damý basqarmasy ınvestıtsııanyń azaıý sebebin túsindirdi.
Aqtóbe oblystyq ındýstrıaldyq-ınnovatsııalyq damý basqarmasy QR Ulttyq banki derekterine súıenip, byltyr ІІІ toqsanda 337,4 mln dollar, al 2023 jyldyń 9 aıynda 604,9 mln dollar ınvestıtsııa tartylǵanyn habarlady. Onyń sebebin de túsindirdi. 2023 jyly ERG kompanııasy shlamdy qaıta óńdeý jónindegi baıytý fabrıkasyn saldy. Bul óndiristiń ınvestıtsııasy - 82,2 mln dollar.
- ERG-diń bas keńsesi Lıýksembýrg pen Nıderlandta tirkelgendikten osy kompanııanyń Qazaqstanǵa salǵan kez kelgen ınvestıtsııasy tikeleı sheteldik ınvestıtsııalar retinde saralanady. Sondaı-aq, 2023 jyldyń sońynda Aqtóbe mys kompanııasynyń aktsıonerleri aýysty. Bul ınvestıtsııa aǵynynyń kórsetkishine keri áser etetin ózgeris. Oblys sheteldik ınvestıtsııalardy tartýda uzaq ýaqyt jetekshi oryndardyń birin ıelenip keldi. Máselen 2014-2024 jyldary aralyǵynda óńirge 10 mlrd dollar tikeleı shetel ınvestıtsııasy tartyldy. Bul degenimiz Qazaqstan boıynsha 6-oryn, onyń ishinde óńdeý ónerkásibine 4,9 mlrd salynyp, elimizde 3-orynda boldy, - dep habarlady Aqtóbe oblystyq ındýstrıaldyq-ınnovatsııalyq damý basqarmasy.
Bıyl Aqtóbede 10 ınvestıtsııalyq jobany iske asyrý josparlanyp otyr. Jalpy kólemi 460 mlrd teńgeni quraıtyn ınvestıtsııa tartylady. Nátıjesinde 1,2 myńǵa jýyq jumys orny ashylady.
- QR Úkimetiniń qaýlysymen «Aqtóbe» arnaıy ekonomıkalyq aımaǵy quryldy. Bul ıvestıtsııa tartýǵa, qosymsha jumys oryndaryn qurýǵa jáne óńdeý ónerkásibiniń úlesin arttyrýǵa múmkindik beredi. Sondaı-aq ımportqa táýeldilikti tómendetý, aralas salalardy damytý jáne taýarlardyń básekege qabilettiligin arttyrý mindetteldi,- dep habarlady Aqtóbe oblystyqındýstrııaldyq-ınnovatsııalyq damý basqarmasy.
Aıta keteıik, keshe Prezıdent Aqtóbe, Almaty, Atyraý, Shyǵys Qazaqstan, Jambyl, Pavlodar, Soltústik Qazaqstan oblystarynda jáne Almaty qalasynda tikeleı shetel ınvestıtsııasyn tartý qarqyny tómendegenin aıtty. Al jeke ınvestıtsııanyń azaıýy bıýdjet esebinen ótelip jatyr.