Aqtóbede tirkeýde joq 126 sheteldik kólik anyqtaldy
AQTÓBE. QazAqparat – Aqtóbede EAEO elderinen ákelingen, biraq tirkelmegen 126 kólik anyqtaldy, dep habarlaıdy QazAqparat tilshisi.
Aqtóbede 1 qarasha aıynan bastap búgingi kúnge deıin «Mıraj – Ýragan» apparattyq –baǵdarlamalyq kesheniniń kómegimen EAEO elderinen ákelingen, biraq tirkelmegen 126 kólik anyqtaldy. Avtomatty tirkeý júıesi arqyly anyqtalǵan ákimshilik quqyq buzýshylyq týraly 270 uıǵarym berildi. 16 júrgizýshi kólik quraldaryn paıdalaný erejelerin buzǵany úshin ákimshilik jaýapqa tartyldy.
«Qylmystyq izdeýde júrgen 7 kólik quraly anyqtaldy. Mysaly, jol qozǵalysy erejelerin qasaqana buzǵan, reseılik Datsun markaly avtokóliginiń júrgizýshisi ustaldy. Oǵan jalpy somasy 600 000 teńgeden astam 21 uıǵarym berildi. Kólik quraldaryn paıdalaný erejelerin jáne «Qazaqstan Respýblıkasynyń mindetti saqtandyrý týraly» Zańnamasyn buzǵany úshin ákimshilik hattamalar toltyryldy. Sonymen qatar, Aqtóbe qalasynyń memlekettik kirister departamentimen birge 1 mln. teńgeden astam memlekettik qaryzy bar 3 júrgizýshi anyqtalyp, ustaldy», - dedi oblystyq PD baspasóz qyzmetiniń jetekshisi Erbolat Sarqulov.
