Aqtóbede terrorlyq shabýyl jasalýy múmkin nysandar tekserilip jatyr
Aqtóbe oblystyq ІІD búgin bazar basshylarymen kezdesti. Kásipkerler úshin kirý, shyǵý esikterine kamera qondyryp, onyń jazbasyn 30 kún saqtaý mindettelgen. Kóbi bul talaptan súrinip, ótken jyly aıyppul tóledi. Aqtóbe oblystyq jergilikti polıtsııa qyzmeti, oblystyq ІІD terrorızmge qarsy kúres basqarmasy talaptar tizimimen tekserip, zańsyzdyq tirkelse, uıǵarym beriledi. Ótken jyly Aqtóbe oblysynda 465 uıǵarym berilip, onyń 34-i boıynsha aıyppul tólendi. Olar belgilengen merzim ishinde zań talaptaryn oryndamaǵan..
«Aqyldy qala» baǵdarlamasy arqyly terrorlyq turǵydan osal nysandardyń beınebaqylaý kamerasyn qadaǵalaýǵa alýdy josparladyq. Olardyń qataryna mektep, balabaqshalar kiredi. Aldymen bárine kamera qondyrylyp, keıin bir tektikten baqylaý júrgizemiz. Tehnıkalyq tekserý jyl saıyn júrgiziletin bolady»,- dedi Aqtóbe oblystyq ІІD basqarma bastyǵy Baýyrjan Atabaev.
Aıta keteıik, Ákimshilik quqyq buzýshylyq Kodeksi boıynsha iri kásiporyndar 500 AEK, orta kásipkerler 300 AEK, al shaǵyn kásipkerler 200 AEK kóleminde aıyppul tóleıdi. Al basshylarǵa 100 AEK kóleminde aıyppul salynady. Aqtóbe oblysyn boıynsha aıyppul tólegen 7 mektep dırektory bar. Olar terrorlyq turǵydan osal nysandarda qaýipsizdik talaptaryn oryndamady. Dırektorlaryń árqaısysy 200 myń teńgeden astam aıyppul tóledi. Halyq kóp shoǵyrlanatyn nysandar: «Aqjelken» aýla klýby, Aqtóbe qalasyndaǵy at sporty mektebi, Qobda aýdanyndaǵy Egindibulaq jastar úıi, Shalqar aýdanyndaǵy №7 orta mektep, Shalqar aýdanynyń Bershúgir orta mektebi, Muǵaljar aýdany, Embi qalasyndaǵy № 1, №2 orta mektepteri, Oıyldaǵy Derbisalın orta mektebi, Alǵa aýdanyndaǵy Eset batyr mektep-balabaqshasy bar. Sonymen qatar, meıramhanalar men Aqtóbe qalasyndaǵy «Tabys» kommýnaldyq bazary talapty oryndamaı, jaýapkershilikke tartyldy.
Aıta keteıik, ótken jyly 34 ákimshilik jaza qoldanylyp, 14 mıllıon teńge aıyppul óndirildi. Quqyq qorǵaýshylary qazirgi kezde tek kamera qondyrý, onyń jazbasyn 30 kún saqtaýdy qatań baqylaıdy. Biraq qytaılyq kameralar sapasyz, adamdardyń bet-álpeti kórinbeıdi. Ázirge bul kemshilik tehnıkalyq talaptar tólqujatyna kirmeıdi.
«Strategııalyq nysandar ishinde Aqtóbe jylý elektr ortalyǵy, «Jańa Áljan» dıirmen kombınaty, «TetısAralGAZ» JShS-nyń Aqkól, Qyzyloı ken oryndary, Jańajol gaz óńdeý zaýyty «QazaqOılAqtóbe» JShS, «Kaspıı neft» JShS, Alǵa aýdanyndaǵy munaı quıý nysanynyń qorshaýy bar. Al qaýipti óndiris nysanynyń arasynda Aqtóbe qalasyndaǵy ulttyq saraptama ortalyǵynyń nysany zań talaptaryn oryndamady. Bári aıyppul tóledi»,- dedi Baýyrjan Atabaev.
