Aqtóbede terrorızm aktisi týraly kórineý jalǵan habarlaý deregi boıynsha qylmystyq is qozǵaldy

AQTÓBE. KAZINFORM – Aqtóbede mektepterge shabýyl jasaıtynyn aıtyp, habarlama taratqan áleýmettik jeli qoldanýshysy izdestirilip jatyr. Terrorızm aktisi týraly kórineý jalǵan habarlaý faktisi boıynsha sotqa deıingi tergep-tekserýdi bastaldy.

Aqtóbe qalasyndaǵy mektepterde qaýipsizdik sharasy kúsheıtildi. Búgin tústen keıin mektepte oqýshylar az boldy.

– Qazir mekteptegi jaǵdaı birqalypty. Áleýmettik jelide aqparat taraǵan soń keıbir ata-analar balalaryn mektepke jibermedi. Biraq mektep shtattyq rejımde jumys istep jatyr. Qaýipsizdik erejelerin saqtap otyrmyz. Kezekshi muǵalimder qoıyldy. Sonymen birge qosymsha esikter jabylyp, bir esik qana ashylyp otyr. Búgin tústen keıin balalardyń jartysynan kóbi sabaqqa kelmedi. Olar onlaın túrde oqytylyp jatyr kelmegen soń. Jalpy bul mektepte myńnan astam bala oqıdy. Al kelgen balalardy tek ata-analary alyp ketýi tıis qaýipsizdik úshin,- №27 orta mektep dırektorynyń oqý isi jónindegi orynbasary Ásel Alıeva.

Al Aqtóbe oblystyq polıtsııa departamenti qylmystyq is qozǵalyp, tergep-tekserý júrip jatqanyn habarlady.

– Qazirgi tańda quziretti organdarmen birlesip, osy aqparatty taratqan tulǵalardy anyqtaýǵa baǵyttalǵan keshendi jumystar júrgizilip jatyr. Oqý oryndarynyń qaýipsizdigin qamtamasyz etý úshin beınebaqylaý júrgizilip jatyr. Al olarǵa jaqyn jerlerde polıtsııa jasaqtary kóbeıtildi. Sondaı-aq bilim berý uıymdarynda ǵımaratqa kirgizý rejımi baqylaýǵa alyndy. Osyǵan uqsas jalǵan habarlamalar bıyl Reseı Federatsııasynyń birqatar qalasynda da bolǵan eken. Bul habarlamalar halyq arasynda dúrbeleń týǵyzýǵa arnalǵan. Azamattardan arandatýshylyqqa berilmeýin jáne tynyshtyqty saqtaýdy suraımyz. Jaǵdaı quqyq qorǵaý organdarynyń baqylaýynda,- dedi Aqtóbe qalalyq polıtsııa basqarmasy bastyǵy Áset Qalıev.

Aıta keteıik, búgin tańerteń Aqtóbe qalasyndaǵy mektepterge shabýyl jasalatynyn týraly habarlandy.

Oblys ákimi Ashat Shaharov tizimge engen birneshe mektepti aralap shyqty.