Aqtóbede terrorıstik akt kezinde qaza bolǵan áskerılerdi eske aldy

AQTÓBE. QazAqparat - Ulttyq ulannyń 6655 áskerı bóliminde eske alý sharasy ótti, dep habarlaıdy QazAqparat tilshisi.

Áskerı bólimde ótken jıynǵa kúshtik qurylym basshylary men oblys ákimi Ońdasyn Orazalın qatysty. Eskertkish belginiń aldynda bir mınýttyq únsizdik jarııalanyp, gúl qoıyldy.

«Beıbit kúni qylmyskerlerdiń qolynan polıtsııa, áskerı qyzmetkerlermen birge turǵyndar da qaza tapty. Qylmyskerlerdiń aramza oılaryn oryndaýǵa quqyq qorǵaý organdarynyń jedel sharalary múmkindik bergen joq. Halyqtyń tynyshtyǵyn qorǵaý jolynda 66/55 áskerı bóliminiń sarbazdary maıor Danıel Maılybaev, kishi serjant Berikjan Qalıev, qatardaǵy jaýynger Dosbol Sapardyń qazalary orny tolmas ókinish. Atalǵan azamattardyń jankeshtilikpen jasaǵan áreketteri laıyqty baǵasyn alyp, táýelsiz Qazaqstannyń erlikter jylnamasynda jazylyp qaldy. Bul oqıǵa barlyǵymyz úshin úlken sabaq bolyp, qoǵamǵa engen dertpen tek memlekettik organdar ǵana emes, jalpy qoǵam bolyp kúresýimiz qajet»,-dedi oblys ákimi Ońdasyn Orazalın.

Aıta keteıik, 2016 jyldyń 5-maýsymy kúni lańkester aldymen qarý-jaraq dúkenine shabýyl jasap, eki topqa bólindi. Biri 6655 áskerı bólimine, ekinshisi qalanyń eski bóligindegi qarý-jaraq dúkenine basyp kirdi. Saldarynan 8 áskerı qyzmetker men beıbit turǵyn qaza tapty. Lańkesterdiń jeteýi sot úkimimen ómir boıyna bas bostandyǵynan aıyryldy. Al qaza bolǵan aqtóbelikterdiń otbasyna materıaldyq kómek berilip, áskerı bólimde esimderi jazylǵan eskertkish taqta ornatyldy.