Aqtóbede termeni estradalyq baǵytta oryndaıtyn ánshiler arasynda baıqaý ótedi
AQTÓBE. QazAqparat - Elimizde alǵash ret estrada ánshileri arasynda «Jibek joly» baıqaýy ótedi. Baıqaý kezinde HІH ǵasyrda ómir súrgen aqtóbelik dástúrli ánshi, jyrshy, termeshilerdiń týyndylary nasıhattalady, dep habarlaıdy QazAqparat tilshisi.
Aqtóbede ótetin «Jibek joly» baıqaýyna Óskemen, Aqtaý, Almaty, Oral, Qyzylorda, Shymkent, Qaraǵandy qalalarynan ónerpazdar keledi. Olar aqtóbelik aqyn-jyraýlardyń týyndylaryn estradalyq baǵytta oryndaıdy. Baıqaýǵa qatysýshylar Qyzyl, Bataqtyq sarysy, Naýryzbek, Ábýbákir Kerderi, Moldabaı, Shernııaz sal, Nurpeıis Baıǵanın, Bákir Tájibaevtyń ánderin oryndaýy tıis.
«Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyna sáıkes «Jibek joly» estradalyq baıqaýy ótedi. Osy jolmen biz Aqtóbeniń jyrshy, termeshilerin elimizge tanytqymyz keledi. Jyrdyń sózin, qurylymyn buzbaı urpaqqa jetkizýdi kózdep otyrmyz. Balalar dástúrli ándi bilmeıdi, ánshini tanymaıdy. Suranys tómen. Sondyqtan osy olqylyqtyń ornyn toltyryp, baıqaýdy aldaǵy jyldary halyqaralyq deńgeıge jetkizýdi kózdep otyrmyz», - deıdi Aqtóbe oblystyq fılarmonııa dırektory Elýbaı Kenjalıev.
Baıqaý kezinde jaryq qoıýshylar, rejısserler arnaıy nomınatsııamen marapattalady. Al bas júldege 500 myń teńge beriledi. Baıqaý sońynda ádilqazylar Aıgúl Qosanova, Ómirqul Aınııazov, Erbolat Qudaıbergen óner kórsetedi. «Alash uly» toby da gala kontsertke qatysady.
