Aqtóbede tergeýshi alaıaqtyǵy úshin 4 jylǵa sottaldy
AQTÓBE. QazAqparat - Aqtóbelik tergeýshi Aslan Saǵandyqov alaıaqtyǵy úshin sottalyp, jábirlenýshige 850 myń teńge materıaldyq shyǵyndy tóleıtin boldy, dep habarlaıdy QazAqparat tilshisi.
Elek ishki ister bóliminde aǵa tergeýshi bolyp jumys istegen Aslan Saǵandyqov Qylmystyq kodekstiń «Alaıaqtyq» baby boıynsha aıypty dep tanyldy.
«Aslan Saǵandyqov kináli dep tanylyp, oǵan 4 jylǵa bas bostandyǵynan aıyrý jazasy taǵaıyndaldy. Ol ómir boıy memlekettik qyzmette jumys isteý quqyǵynan aıyrylsyn. Jazasyn qylmystyq atqarý júıesiniń qaýipsizdigi ortasha mekemesinde óteıdi», - dedi sýdıa Aınur Bekmuhambetova. Sonymen qatar, sottashýly A.Saǵandyqov jábirlenýshige 850 myń teńge, sot shyǵyndary úshin 1 mıllıon teńgeden astam tóleýi tıis.
Іs materıalyna súıensek, aǵa tergeýshi Qylmystyq kodekstiń «Adam óltirý» baby boıynsha isti qarap, sotqa jetkizgen. Sol aralyqta tergeýshi aıyptalýshy taraptan saraptama jasatý úshin zańsyz 1 mıllıon teńge aqsha suraǵan. Balasynyń kinásiz ekenin dáleldemek bolǵan Sazonov suraǵanyn berip, keıin Sybaılas jemqorlyqqa qarsy is-qımyl ulttyq bıýrosyna shaǵymdanady.
«Sot úkimi ádil emes, zańsyz dep esepteımin», - dedi sottalýshy Aslan Saǵandyqov.
