Aqtóbede tergeý ızolıatorynda otyrǵan adamnan koronavırýs ınfektsııasy anyqtaldy
AQTÓBE. QazAqparat - Aqtóbe oblysynda búgin «COVID-19» ınfektsııasyn juqtyrǵan taǵy 4 jaǵdaı tirkeldi.
Dıagnostıkalyq zertteý qorytyndysy boıynsha ızolıatorda otyrǵan 36 jastaǵy er adamnan vırýs anyqtaldy.
«Іndetke shaldyqqan 1984 jylǵy er adam ýaqytsha oqshaýlaý ızolıatorynda analız tapsyrdy. Al qalǵan úsheýi naýqaspen qarym-qatynasta bolǵany úshin medıtsınalyq baqylaýǵa alynǵan bolatyn. Qazirgi tańda olar oblystyq juqpaly aýrýlar statsıonarynyń boks palatasyna jatqyzyldy. Naýqastardyń jaǵdaıy qanaǵattanarlyq. Bekitilgen hattamaǵa sáıkes tıisti emdik sharalar jasalyp jatyr. Іndetke shaldyqqan adammen baılanysta bolǵan adamdar anyqtalyp, barlyǵy medıtsınalyq baqylaýǵa alyndy. Aýrý oshaqtarynda epıdemıologııalyq zertteý jumystary, dezınfektsııa júrgizildi. Naqtylasaq, buryn indet juqtyrǵan adammen kórshi turǵan eken», - dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti.
Al taǵy úsh adam buryn indetke shaldyqqan adammen baılanysta bolǵan.
«32 jastaǵy áıel, 5 jáne 11 jastaǵy balalardan da indet anyqtaldy. Olar keshe tirkelgen 55 jastaǵy er adamnan juqtyrǵan. Búgingisi qyzy men eki jıeni. Jıenderi ata-ájesine birneshe ret qonaqqa barǵan. Tótenshe jaǵdaı kezinde biz úıden shyqpaýǵa, qonaqqa barmaýǵa keńes bergen bolatynbyz. Al turǵyndar qulaq aspaı, aýrý juqtyryp alyp otyr. Keshe provızorlyq aýrýhanada boldy, búgin ınfektsııalyq aýrýhanaǵa jatqyzyldy», - dedi oblystyq densaýlyq saqtaý basqarmasynyń basshysy Áset Qalıev.
