Aqtóbede tergeý ızolıatorynan qashyp ketken kúdiktiler sottaldy

AQTÓBE. KAZINFORM – Aqtóbede tergeý ızolıatorynan qashyp ketken eki kúdiktiniń qylmysy dáleldenip, olar bas bostandyǵynan aıyryldy. Al olardyń birine erip, buzaqylyq jasaǵan taǵy bir sottalýshyǵa bas bostandyǵynan shekteý jazasy kesildi.

Qylmystyq is Aqtóbe qalasynyń №2 sotynda qaraldy. Іs materıalyna súıensek, eki sottalýshy asa iri mólsherde urlyq, aldyn ala sóz baılasý arqyly adamdar tobymen buzaqylyq jasaǵany úshin kúdikti dep tanylǵan. Olar tergeý ızolıatorynda tanysyp, polıtsııadan qashyp shyqqan.

- Sottalýshy E. jáne K. kamera esiginiń qulyptalmaǵanyn, sondaı-aq tutqyndarǵa tamaq berýge arnalǵan tereze ashyq qalǵanyn baıqap, kúzet qyzmetkerlerin aıqaılap shaqyrady. Qyzmetkerlerdiń jaýap bermeıtinine jáne uıyqtap jatqanyna kóz jetkizip, temir esikti ashqan. Ári qaraı E. jáne K. kameradan shyǵyp, magnıtpen jabylǵan temir esikti kúshtep ashady. Keıin temir qaqpadan sekirip, qashyp ketken. Sottyń úkimimen sottalýshylar kináli dep tanylyp, E. 5 jyl, K. 3 jyl 3 aı merzimine bas bostandyǵynan aıyryldy. Al Qylmystyq kodekstiń «Buzaqylyq» baby boıynsha aıyptalǵan P-ǵa 2 jyl 6 aı merzimge bas bostandyǵyn shekteý jazasy taǵaıyndaldy, - dep habarlady Aqtóbe qalasy №2 sotynyń baspasóz qyzmeti.

Úkim zańdy kúshine engen joq.