Aqtóbede tergeý ızolıatory apatty jaǵdaıda tur
AQTÓBE. KAZINFORM — Qylmystyq atqarý júıesiniń № 70 mekemesi apatty jaǵdaıda tur. Ári qazirgi kezde adam sany shamadan tys kóp.
Aqtóbe qalasynda ornalasqan № 70 mekemesi 1948 jyly salynǵan. Qazirgi kezde tergeý ızolıatorynyń bir bóligi múlde kádege aspaı tur. Sebebi qabyrǵasynyń kirpishi sógilip, shatyrynan sý ketti. Ǵımarat resmı túrde apatty dep tanylǵan.
— «Zań jáne tártip» qaǵıdaty aıasynda oblystyq máslıhat depýtattary, «Amanat» partııasynyń oblystyq fılıalymen birge Qylmystyq atqarý júıesiniń № 70 mekemesi keldik. Sot qaýlysymen oqshaýlanǵan adamdardyń qandaı jaǵdaıda turyp jatqanyn qarady. Ǵımarat 1948 jyly berilgen. Birshama korpýsy apatty jaǵdaıda tur. Depýtattar bárin kórdi. Jergilikti bıýdjetten jóndeýge qarjy bólý jaıy aıtyldy. Apatty jaǵdaıda turǵan jerde kúdiktiler joq. Jalpy Aqtóbe qalasynda tergeý ızolıatoryn salý suraǵy sheshilgen. Eger qurylys júrse, bul jer basqa maqsatqa beriledi, — dedi Aqtóbe oblysy prokýrorynyń birinshi orynbasary Talǵat Álibaev.
Aıta keteıik, tergeý ızolıatory 192 adamǵa shaqtalǵan bolsa, qazir 330 adam bar. Olardyń arasynda isi tergelip jatqandar men úkim shyqsa da kúshine enbegen jazasyn óteýshiler men kúdiktiler bar.
Aıta keteıik, Aqtóbede tozyǵy jetken 230 úı bar. Úılerdiń naqty qaı ýaqytta jóndeletini ázirge belgisiz.