Aqtóbede temirjolshynyń ólimine qatysty tergeý júrip jatyr

AQTÓBE. KAZINFORM – Temirjolshy jazataıym oqıǵa kezinde bir aıaǵynan aıyrylyp, aýrýhanada kóz jumdy. Qazirgi kezde tergeý jumysy júrip jatyr.

Oqıǵa Aqtóbe oblysynyń Shalqar aýdany aýmaǵynda boldy. Oblystyq eńbek ınspektsııasy departamenti «QTJ – Júk tasymaly» JShS Aqtóbe bólimshesinen habarlama alǵan boıda komıssııa quramyn anyqtaý úshin hat joldaıdy. Keıin arnaıy komıssııa quryldy. 

- Shalqar aýdanyna jumys saparymen baryp, mashınıst, mashınıst kómekshisimen sóıleskenbiz. Olar jyldamdyq 20 saǵ/km bolǵanyn aıtty. Sol kezde olar jol jıegindegi elektr qorabynda temirjolshynyń turǵanyn kórgen. Janynan ótip ketip, artyna qaraǵanda jumysshy jerde jatqan. Qulap qalǵan degen boljam bar. Bul jerde poıyz qaqpaǵan bolýy múmkin. Bir aıaǵyn poıyz basyp ketip, aýrýhanada kóz jumdy. Ázirge is boıynsha komıssııa qorytyndysy shyqpady,- Aqtóbe oblystyq eńbek ınspektsııasy departamenti eńbek qaýipsizdigin baqylaý jáne eńbekti qorǵaý bólimi basshysynyń mindetin atqarýshy Erkebulan Omar.

Eger alǵan jaraqaty men ólim sebebi jumysqa tikeleı qatysty bolsa, is polıtsııaǵa joldanady. Polıtsııa Qylmystyq kodekstiń «Eńbekti qorǵaý qaǵıdalaryn buzý» baby boıynsha qozǵaıdy. 

Buǵan deıin óndiristik jaraqat alǵan adamǵa ótemaqy qalaı esepteletini týraly jazyldy.

Jumys ornynda jazataıym oqıǵa tirkelse jumys berýshi 24 saǵat ishinde aımaqtardaǵy eńdek ınspektsııasy departamentine habarlama berýge mindetti. Al ótemaqyny tóleý tártibi komıssııa sheshiminen soń anyqtalady.