Aqtóbede temirjolshy jumys ornynda jaraqat alyp, tósekke tańylyp qaldy
AQTÓBE. KAZINFORM — Dilhan Aımaǵambettiń jambasy synyp, tura almaıdy. Baýyrlary eńbek ınspektsııasynyń tekserý qorytyndysyn joqqa shyǵaryp, qaıta shaǵym túsirdi.
Oqıǵa 2025 jyldyń qazan aıynda Hromtaý aýdanyndaǵy Nıkeltaý stansasynda boldy. Dilhan Aımaǵambet 15 qazan kúni «Temirjol jóndeý» — «Avtodorstroı» JShS-de kezekti vahtalyq jumysyna shyǵady. Al 18 qazanda «ústine shpal qulap ketti» degen habar keledi. Baýyrlary jaraqaty aýyr dep oılamady. Sebebi áriptesteri jedel járdem shaqyrmaı, taksıge mingizip, ony Aqtóbe qalasyndaǵy aýrýhanaǵa ákelgen.
— Oqıǵa ornynda jedel medıtsınalyq kómek kórsetilmeı, bir jarym saǵattyq qashyqtyqtaǵy qalaǵa ákelgen. Onyń jaǵdaıy aýyr boldy. Birden ota jasaldy. Sebebi qýyǵy jarylyp, ish qurylysynyń bárine tarap ketken. Jambas súıegi synǵan soń temirmen tarttyryp tastady. Birneshe ota jasalǵan kezde emniń de durys júrgizilmegenin bildik. Astana qalasyna joldama surap, qańtar aıynan beri kútip otyrmyz. 31 naýryz kúni elorda dárigerleri qaraıdy. Bir qıyny áli kúnge deıin múgedektik berilmedi. Qazir inimdi baýyrlarymmen birge qarap otyrmyz. Jaǵdaıy qıyn, — dedi apasy Albına.
Oqıǵadan keıin inisiniń áriptesteri ǵana kelip, jaǵdaıyn bilip, az-maz kómek kórsetken. Al basshylary áli kúnge deıin baılanysqa shyqpady. Tipti jumys orny «júk ildirýshi» mamandyǵynyń kýáligin bergen. Al Dilhan Aımaǵambet bul týraly múlde bilmeıtin bolyp shyqty.
— Qylmystyq is qozǵalǵanymen, toqtatyp tastaǵan. Bul zańsyzdyq. Zańger jelilik polıtsııa men eńbek ınspektorlarynyń jumysy buzýshylyqty anyqtap, shaǵym túsirdi. Qazirgi kezde isti qaıta qozǵap, tergeý júrip jatyr. Biz ádildikti talap etemiz. «Temirjol jóndeý» — «Avtodorstroı» JShS-i barlyq jaýapkershilikti alyp, ómir boıy járdemaqy tóleýi tıis. Túnde de qınalyp, aqyly túrde qyzmet kórsetetin dárigerler shaqyramyz. Em-domyna da mol qarjy kerek. Dene qyzýyn túsire almaı, qınalamyz. Astanada jambas súıegin qaıta salady. Aqtóbelik travmatologtardyń otasy sátsiz shyqsa da aýrýhanadan shyǵardy. Endi ony astanalyqtar túzeıdi, — dedi Albına.
Aqtóbe oblystyq eńbek ınspektsııasy Dilhan Aımaǵambettiń isin tekserip, jumys berýshiniń kinási 70%, jumysshynyń kinási 30% degen qorytyndyǵa kelgen. Dilhan Aımaǵambettiń baýyrlary bul tujyrymǵa kelispeı, QR Eńbek jáne halyqty áleýmettik qorǵaý mınıstrliginiń Memlekettik eńbek ınspektsııasy komıtetine shaǵym túsirdi. Endi qaıta tekserý júrgizilýi múmkin.
Buǵan deıin habarlaǵanymyzdaı, Abaı oblysyndaǵy Orlov shahtasynda eki jumysshy ýlanyp, bireýi aýrýhanada bara jatqan jolda qaza boldy. Oqıǵanyń mán-jaıy men sebepteri anyqtalyp jatyr.